12 senege maküm etilgen qırımtatar faalcisi Tofik Abdulgazievniñ verem hastalığını çekkeni ögrenildi.
Advokat Emil Kurbedinov "Qırım birdemligi"ne bu aqqında haber berdi.
Belli oldı ki, tahminen bir ay evel Tofik Çelâbinskteki 3. apishane hastahnesine yollandı.
Bundan ğayrı, ekimler Tofikniñ başqa hastalıqlarnı çekkenini ögrendiler: eki taraflı pnevmoniya, kiçik sol taraflı gidrotoraks (aq ciğerlerde şingenlik), orta anemiya, bozulğan mitral klapanen birleşken toqumanıñ displaziya sindromı (yürek hastalığı), hronik yürek kemligi, hronik gastrit ve nefrolitaz.
Siyasiy mabüsniñ apayı Aliya Kurtametova Tofikniñ teşkerüvi, diagnozı ve diagnoz bildirüv izinnamesini elektron posta vastasınen aldı.
Emil Kurbedinov qayd etti ki, şimdi Abdulgazievniñ ağır hastalıqları sebebinden makeme içün o, ariza ve kerekli vesiqalarnı azırlay. Bundan ğayrı, Tofikni ihtiyac duymanı tedaviylemeleri içün Çelâbinsk vilâyetindeki insan aqları temsilcisi Yuliya Sudarenkoğa hitap etti.
Aliya Kurtametovanıñ sözlerine köre, aqayınen bağlanmaz ve özüni nasıl duyğanı aqqında iç bir şey belli degil.
"Biz raatsızlanamız. Böyle diagnoznen Tofik daa büyük tedaviylev, baqım ve mahsus aşqa ihtiyac duya, amma apishane şartlarında bu olmaz. Onıñ sağlıq alı aqqında tek bilgenim şey, o normaldir. Reanimatsiyadan daa yaramay şartlarda hastahanede yata", — dep siyasiy mabüsniñ apayı qoştı.
Hatırlatamız ki, saban ayınıñ 22-sinde Tofik Abdulgazievni Verhnöuralsktaki apishaneden Çelâbinskteki 3. GUFSVP mahsus tuberkulöz hastahanesine belli olmağan hastalıqnen acelen alıp ketirdiler. Anda eki afta keçirdi. 2023 senesi oraq ayında Verhnöuralsk apishanesine onı etap ettiler. O vaqıttan berli pek azladı ve el buğumlarınıñ ağırğanına şikâyet etti.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Telegram ve Facebookta Suspilne Qırım haberlerine abune oluñız
