2025 senesi 317 biñden çoq abituriyent Milliy çoq fenli testte (NMT) iştirak etmek içün qayd etildi, amma olarnıñ arasında qırımtatar tilinde imtian bermek içün saylağan iç bir adam tapılmadı.
Ukrayin tasil keyfiyetini qıymetlendirüv merkeziniñ (UTKQM) müdiri Tetâna Vakulenko test neticelerini taqdim etkende bunı bildirdi.
Onıñ malümatına köre, 4 biñden ziyade test vazifeleri ukrayin ve milliy azlıqlarnıñ tillerinde — lehçe, macarca, romanca azırlandı. Mektepte qırımtatar tilini ögrengenler içün testni qırımtatarca bermek imkânı da bar edi, amma "abituriyentlerniñ iç birisi böyle bir saylav yapmadı".
Vakulenko qayd etti ki, 450-den ziyade iştirakçi macar tilini sayladı, leh tilni ise dört abituriyent sayladı.
Hatırlatamız ki, ilk küz ayından "Kıyiv-Moğıla akademiyası" Milliy universitetinde qırımtatar tili saylav fen olaraq ögretilmege başladı. Aliy oquv yurtlarında ukrayin cemiyetiniñ çoq milletli tabiatını daa teren añlamağa yardım etken zemaneviy oquv usullarını qullanmağa planlaştıralar.
Ukrayina qavmiy-siyasiy ve vicdan serbestligi meseleleri devlet hızmetiniñ yolbaşçısınıñ birinci muavini Viktor Voynalovıç, 2026 senesi ilk küz ayınıñ 10. kününi Qırımtatar tili ve edebiyatı künü olaraq qanun seviyesinde qayd etile bilecekgini bildirdi. Aynı zamanda, bu tilniñ imlâsı üzerinde büyük iş alıp barıla, hususan latin urufatına keçüv üzerinde.
Bundan evel Qırımtatar Milliy Meclisiniñ reisi Refat Çubarov tasil saasında sistematik deñişmelerge çağırdı, qırımtatar tilinde tasil bergen ayrı mekteplerniñ teşkil etilmesi kerek olğanını qayd etti.ю.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
