İlk küz ayından başlap "Kıyiv-Moğıla akademiyası" Milliy universitetinde (NaUKMA) qırımtatar tili saylanğan fen olaraq ögretilmege başladı. Yuqarı oquv yurtlarında ukrayin cemiyetiniñ çoq milletli tabiatını daa teren añlamağa yardım etken zemaneviy oquv usullarını qullanmağa planlaştıralar.
İlk küz ayınıñ 11-nde bu fenniñ ocası, tilşınas Ayşe Arnautova Qırımtatar resurs merkezine bunı bildirdi.
Arnautovanıñ qayd etkenine köre, bu til tek qonuşuv vastası degil, aynı zamanda qırımtatarlarnıñ unikal medeniyeti, edebiyatı ve ananeleriniñ taşıyıcısıdır.
"Ukrayin universitetlerinde qırımtatar tiliniñ ögretüvi — bu, esasen, devletniñ topraq bütünliginiñ tasdıqlanmasıdır. Bu, Qırımğa tek coğrafik topraq olaraq degil de, Ukrayinanıñ tamır halqı olğan qırımtatarlarnıñ tuvğan toprağına olğan hususiy munasebetiniñ numayışıdır. O, asırlar devamında tek Qırımnıñ degil de, umumen Ukrayinanıñ tarihı ve medeniyetini şekillendirgen halqnıñ tarihiy mirası ve kimligine sayğı köstere", — dep qayd etti o.
QRM diger ukrayin tasil müessiselerini de qırımtatar tilini Ukrayinanıñ tamır halqınıñ tili olaraq saqlamaq, inkişaf ettirmek ve populârlaştırmaq içün oquv esnasına qoşulmağa çağıra.
Hatırlatamız ki, 2026 senesi ilk küz ayınıñ 10-nı Qırımtatar tili ve edebiyatı künü olaraq qanun seviyesinde tanıy bilirler, dep Ukrayina qavmiy siyaset ve vicdan serbestligi meseleleri devlet hızmetiniñ yolbaşçısınıñ birinci muavini Viktor Voynalovıç bildirdi. Aynı zamanda, bu tilniñ imlâsı üzerinde büyük iş alıp barıla, hususan latin urufatına keçüv.
Bundan evel Qırımtatar Milliy Meclisiniñ reisi Refat Çubarov tasil saasında sistemaviy deñişmelerge çağırdı, qırımtatar tilinde tasil bergen ayrı mekteplerni teşkil etmek kerekligini qayd etti.
Bundan da ğayrı, ilk küz ayınıñ 10-nda Ukrayina Yuqarı Şurasınıñ VİETnıñ reintegratsiyası meseleleri eyyeti, işğalden azat etüv, akimiyet ve ukrayin kimliginiñ ğayrıdan tiklenüvi boyunca milliy siyasetni işlep çıqarmaq içün iş gruppasını teşkil etmek qararını qabul etti. Bunı tafsilâtlıca Suspilne Qırımğa mütenasip alt komitetniñ reisi, halq mebusı Tamıla Taşeva bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
