Qırımda işğalciler balalarnı arbiyleştirmege devam eteler. Yarımadanıñ işğalli prokurorlığı bildirdi ki, Yevpatoriya (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) rayonındaki "M. Kudri adına Qara deñiz orta mektebi"niñ kadet sınıfınıñ talebeleri "Nesillerniñ hatıra devriyesi" küz etapınıñ açılışında iştirak ettiler.
Bu sınıf — "rayon prokurorı"nıñ "astında"dır, dep işğalli müessise Telegramda yazdı.
"Devriyede iştirak etmek — bu tek anane degil, bu, ecdatlarnıñ istidatını añmaq ve ürmet etmek, kelecek nesilge öz memleketiniñ tarihına sayğı köstermek imkânıdır", — dep haberde qayd etildi.
Hatırlatamız ki, ilk küz ayınıñ 6-nda Büyük Britaniya Mudafaa nazirligi Rusiyeniñ işğal etilgen topraqlarda, hususan Qırımda, ukrayin balalarına nisbeten yapqanı faaliyet aqqında istihbarat esabatını derc etti. Nazirlik qayd etti ki, işğalciler işğal etilgen topraqlarda balalarnıñ "mecburiy siyasiy terbiyesi"ni ve arbiyleştirilüvini devam ettireler. Birleşken Qırallıq Mudafaa nazirligi 2025 senesi ilk küz ayınıñ 6-nda X içtimaiy ağında bunı bildirdi.
Bundan da ğayrı, Yale Universitetiniñ Halq sağlığı mektebi uzurında Gumanitar tedqiqatlar laboratoriyası Rusiyede 210 müessise açtı, anda Rusiyeniñ vaqtınca işğal etilgen ukrayin topraqlarından hırsızlağanı balalarnı alıp keteler. Ukrayin balaları da arbiyleştirile. Bu, Yale universitetiniñ Halq sağlığı mektebi uzurında Gumanitar tedqiqatlar laboratoriyasınıñ maruzasında aytıla.
2025 senesi çiçek ayına işğal etilgen Qırımda 260 kadet sınıfı bar edi. Keçken oquv yılınıñ soñunda olarnıñ sayısı 197 edi — yani yıl devamında işğalciler 63 yañı oquv yurtunı açtılar. Bundan da ğayrı, 16 kazak sınıfı bar. Umumen yarımadanıñ mekteplerinde 6265 bala arbiy işlerni ögrene.
Çiçek ayınıñ 3-nde "Rusiyeniñ Ukrayinanıñ VİETda balalarnıñ şahsiyetini yoq etüv siyaseti" analitika esabatı taqdim etilgende bu aqqında haber berildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
