2025 senesi çiçek ayına qadar işğal etilgen Qırımda 260 kadet sınıfı çalışa. Keçken oquv yılınıñ soñunda 197 böyle sınıf açıldı, yani yıl devamında işğalciler 63 yañı sınıf açtılar. Bundan da ğayrı, 16 kazak sınıfı bar. Umumen yarımadanıñ mekteplerinde 6265 bala arbiy işlerni ögrene.
Çiçek ayınıñ 3-nde "Rusiyeniñ balalarnıñ kimligini yoq etüv siyaseti" talil maruzasınıñ taqdim merasimi vaqtında "Almenda" vatandaşlıq maarif merkeziniñ reisi Mariya Sulâlina buın bildirdi.
Onıñ fikrince, 2025 senesi işğal etilgen topraqlarda balalarnıñ askeriyleştirüvi artar.
"2025 senesinde, tek quvetleşüv olacağını añlaymız, çünki 2025 senesi Rusiye Federatsiyasında Vatan qorçalayıcısı yılı olaraq ilân etildi. Ve onıñ çerçivesinde askeriyleştirüvniñ arttırılması içün bir sıra tedbirler planlaştırıla. Ve körgeniñiz kibi, biz endi 2022 senesinden işğal etilgen topraqlarda klassik adiselerni qayd etemiz, hususan Herson ve Zaporijjâ vilâyetlerinde. Em de gençlik siyasetine masraflarnıñ artqanını köremiz", — dey Sulâlina.
"Almenda" teşkilâtınıñ malümatına köre, Herson vilâyetiniñ işğal etilgen qısmında 9, Zaporijjâ vilâyetiniñ duşman kontrol etken topraqlarında — 13, Luğansk vilâyetinde — 86 kadet sınıfı çalışa. Donetsk aqqında iç bir malümat yoq.
İşğal etilgen topraqlarda "Yunarmiya"ğa celp etilgen balalarnıñ sayısı da arttı. 2017 senesi Qırımda olarnıñ sayısı bir buçuq biñ olsa da, 2024 senesi boş ayda — 15 biñden çoq edi.
"Eger biz Herson vilâyetiniñ işğal etilgen topraqlarına baqsaq, bu 200 000-den 600 000-ge qadar bala, bu da tek bir yıl içinde bayağı büyük bir raqam. "Yunarmiya" aqqında aytqanda, bizler, arbiyleştirüv yönelişiniñ pek muayyen tedbirleri aqqında aytamız. Bu em kelecek komandanlar mektebi, em de bomba qullanılğan mahsus lagerler. Bu, balalarımıznı arbiy vazifelerni nasıl becermege ögretken Rusiye arbiy hızmetçilerinen iş", — dep ayta Suliânina.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
