AQŞ prezidenti Donald Trump arman ayınıñ 18-nde Vaşingtonda Ukrayina prezidenti Zelenskıy ve Avropa memleketleriniñ liderlerinen körüşüvniñ neticelerini izaatladı. Hususan, o, 2014 senesi Rusiye cenkni başlatqanınıñ sebeplerini talil etip, Putinniñ Qırımnı almaq ve Ukrayinanıñ NATOğa kirmesine yol bermemek istegenini qayd etti. AQŞnıñ şimdiki yolbaşçısı yarımadanıñ işğali içün o vaqıt Amerika lideri olğan Barak Obamanı qabaatladı.
Donald Trump Fox News telekanalına bunı añlattı.
"Cenk kerçekten NATO ve Qırım sebebinden başlandı — olar (ruslar — muar.) Qırımnı qaytarmağa istey ediler. Bu, belki de, menim körgenim eñ yaramay mülk añlaşması çerçivesinde Obama tarafından bir kere bile ateş açılmayıp yapıldı. Onıñ içün olar (ukrayinliler — muar.) öz deñiz yalı toprağınıñ çoqusını berdiler, barışıq içün. Bu nasıl çalışqan edi? Pek yahşı degil. Qırım — Ukrayinanıñ incisi, ve Obama onı berdi. Onı teslim etmege talap etti. Rusiye kelip, onı baladan tatlı kibi alıp ketti. Ve bu, kerçekten de, Obamanıñ hatası edi", — dep Trump ayttı.
Donald Trump intervyuda bildirdi ki, Qırımnıñ işğali Ukrayina ve Rusiye arasında devam etken zıddiyetniñ sebebi olğanını tüşüne.
"Ukrayina halqı bu vaqia yüz bergende alçaqlandı. Qırımnı teslim etkende çoq nefret doğurdı, lâkin bunı yapmağa mecbur degil ediler. Bir kere bile ateş açılmadı. Olar (ruslar — muar.) sadece eñ qıymetli ve eñ büyük, eñ güzel topraqnı tutıp aldılar. Bu kerçekten büyük bir leyha. Men buña baqam ve aytam: "Ne içün o olarğa böyle yaptı?" Şunıñ içün büyük duşmanlıq bar, ve belki de, bu doğru", — dep AQŞ prezidenti tüşündi.
AQŞ prezidenti ayttı ki, Putin Ukrayinanıñ NATOğa kirmesine iç bir vaqıt yol bermez.
"Ve olar (ukrayinliler — muar.) NATO azası olmaq istegenlerini ayttılar. Ebet, bularnıñ ekisi de imkânsız, çünki, daa bir kere, Putinden evel, bu Rusiye ya da Şuralar Birligi tarafından yasaq etilgen edi, ya da er angi bir şekilde adlandırılsa da. Bu imkânsız edi. Rusiye dedi ki, sıñırımızda duşman olğanını istemeymiz. Amma olar (ukrayinliler — muar.) kelip, Amerika Qoşma Ştatlarından olarnı NATOğa kirsetmege rica ettiler. Ve er kes bunı yapmaq imkânsız olğanını bile edi. Bunı yapmaq mümkün degil", — dep Trump ayttı.
Arman ayınıñ 18-nde Trupmnıñ Zelenskıynen körüşüvi aqqında ne bilemiz
Arman ayınıñ 18-nde AQŞ prezidenti Trump ve Ukrayina prezidenti Zelenskıy arasında sammit olıp keçti. Ukrayina lideri açıq eki taraflı körüşüvni "muvafaqiyetli" olaraq tanıdı. Onıñ aytqanına köre, bu olarnıñ eñ yahşı subeti edi. O şunı da qayd etti ki, topraq deñiştirüvinen bağlı "hassas meseleler" tek Ukrayina, AQŞ ve Rusiye liderlerinen üç taraflı körüşüvde muzakere etile bile.
Zelenskıy ve Trump Ukrayina içün havfsızlıq kefaletlerini ve Putinnen üç taraflı muzakerelerni muzakere ettiler. Bundan da ğayrı, cenk meydanı vaziyeti ve silâ meselesi baqıldı. Ukrayina lideri qayd etti ki, ordu silâlanuvınıñ maliye etilmesi, hususan ava mudafaası saasında, kelecekte havfsızlıq kefaletleriniñ esas qısmı olacaq.
Zelenskıynen beraber Vaşingtonğa Almaniya kantsleri Fridrih Merts, İtaliya baş naziri Corca Meloni, Finlândiya prezidenti Aleksandr Stubb, Frenkistan prezidenti Emmanuel Makron, Büyük Britaniya baş naziri Kir Starmer ve NATOnıñ baş kâtibi Mark Rütte keldiler. Olar Oval odasında muzakerelerge qoşuldılar.
Trump, Zelenskıy ve Avropa liderlerinen körüşkende, ortaqlar tarafından AQŞ koordinatsiyasında berilecek Ukrayina havfsızlığı kefaletlerini muzakere etkenini bildirdi.
Muzakerelerden soñ AQŞ prezidenti Rusiye yolbaşçısına telefon etip, Zelenskıy ve Putinniñ körüşüvi azırlanılğanını bildirdi. Onıñ aytqanına köre, bundan soñ AQŞ, Rusiye ve Ukrayina liderlerinen üç taraflı körüşüv ola bilir.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
