İşğalli Qırım Yuqarı makemesi advokat Edem Semedlâyevniñ uquqçı Rustem Kâmilevniñ 10 künlik apis cezasına qarşı şikâyet arizasını baqtı. Adamnı apiste qaldırdılar.
Bunı advokat Edem Semedlâyev bildirdi, dep "Qırım birdemligi" cemaat teşkilâtı haber etti.
Onıñ aytqanına köre, makeme Kıyiv rayon makemesiniñ qararını yerine ketirdi. O, qorçalayıcı tarafnıñ iç bir delilini qabul etmedi.
"Rustem 10 künlik apis cezasını mahsus memuriy apishanede keçirecek. Şaşılacaq bir şey, muracaatımız qanaatlendirildi ve Rustemni makeme zalına ketirdiler, o da makeme esnasında iştirak etti", — dep tarif etti advokat.
O şunı da qoştı ki, Rustem Kâmilev özüni "yahşı" duya ve er keske selâmlarını yollay.
Hatırlatamız ki, boş aynıñ 7-nde İşğalli Aşırıcılıqqa qarşılıq merkeziniñ hadimleri Rustem Kâmilev ve advokat Lilâ Gemeciniñ evini tintken soñ Kâmilevni tuttılar.
İşğalciler oña qarşı "Rusiye Federatsiyası Silâlı quvetlerini itibardan tüşürüvi" ve "natsist timsalleriniñ teşviqatı" sebebinden eki "memuriy protokol" tizdiler, bundan soñ onı 10 künge apiske aldılar ve 50 biñ ruble para cezasını berdiler.
Ukraina prezidentiniñ Qırım Muhtar Cumhuriyetindeki temsilciligi boş aynıñ 7-nde Gemeci ve Kâmilevniñ evinde keçirilgen tintüvni takbih etti.
İşğal etilgen Qırımda advokatlarnıñ taqipleri
2023 senesi orta küz ayınıñ 13-nde ruslar advokat Oleksiy Ladinni tuttılar. Tintüv ve yaqalav vaqtında ondan advokat sırını taşığan malümat alındı. Ladin 14 künge "yasaqlanğan timsallerni numayış etkeni" içün apiske alındı ve içtimaiy ağda cenkke qarşı yazısı içün para cezasını aldı. Qırımnıñ işğalli polisi apiske alınğan advokatnıñ uquqiy faaliyet litsenziyasını lâğu etmege rica etti.
2022 senesi arman ayında Çeçenistan Advokatlar palatası qırım advokatları Lilâ Gemeci, Rustem Kâmilev ve Nazim Şeyhmambetovnı ihtisasiy statusından marum etti. Bu sebepten olar cinaiy işlerde iştirak etip olamaylar.
2022 senesi mayıs ayında işğalciler eki imayecini tuttılar: Emine Avamileva beş kün apiske alındı, Ayder Azamatov sekiz künge apiske alındı. Ekisi de makemege Nazim Şeyhmambetovnı qorçalamaq içün kelgenlerinde yaqalandı.
2023 senesi mayısnıñ 26-nda işğal etilgen Qırımda "makeme" advokat Edem Semedlâyevni "Rusiye Silâlı quvetleriniñ itibarını tüşürüvde" qabaatlı tanıdı. Advokat 75 biñ ruble para cezasını aldı.
Advokat Emil Kurbedinovnı kiçik aynıñ 15-ne qadar eki kere tuttılar: 2017 ve 2018 seneleri.
2023 senesi çiçek ayınıñ 15-nde işğalciler qırım advokatları Lilâ Gemeci ve Rustem Kâmilevniñ advokatlıq litsenziyasını lâğu ettiler, şunıñ içün olar öz imayesi altındaki şahıslarnı cinaiy davalarda qorçalap olamay, olarnıñ menfaatlarını makemege qadar taqiqat ve makemelerde temsil etip olamay. Olarnıñ arasında 13 qırım siyasiy mabüsi bar.
Telegram, WhatsApp ve Facebookta Suspilne Qırım haberlerine abune oluñız
