İşğalciler tarafından boş aynıñ 7-nde tutulıp alınğan ve 10 künge apiske alınğan uquqçı Rustem Kâmilev şimdi Aqmescitteki mahsus apishanedememuriy apiske alınğan şahıslar içün mahsus izolâtor ya da vaqtınca tutuv yeri buluna. Rusiye uquq qorçalayıcıları bildirdiler ki, adam "Rusiye ordusını itibardan tüşürüv" ve "natsist timsalleri numayış etilmesinde" şübeli sayıla.
Bunı advokat Edem Semedlâyev bildirdi, dep "Qırım birdemligi" cemaat teşkilâtı yazdı.
Protokol tizilgende ve birinci instantsiya makemesinde Rustem Kâmilevniñ menfaatlarını temsil etken advokat, boş aynıñ 11-nde saba uquq qorçalayıcı Qırımnıñ işğalli Yuqarı makemesine şikâyet arizasını bergenini bildirdi.
"Qarar çıqarılğanda memuriy qanun qaideleriniñ bozulğanını tüşünem. Makeme dava malümatlarını tam ve obyektiv şekilde ögrenmedi, olarda bir-birine zıt kelgen şeyler bar", – dep qayd etti Semedlâyev.
Advokatnıñ aytqanına köre, esas sebepleri – cinayet terkibiniñ olmaması ve aşırıcılıq timsallerini köstermek niyeti oldı.
Hatırlatamız ki, boş aynıñ 7-nde İşğalli Aşırıcılıqqa qarşılıq merkeziniñ hadimleri Rustem Kâmilev ve advokat Lilâ Gemeciniñ evinde tintüv keçirdi, bundan soñ Kâmilev tuttılar.
İşğalciler oña qarşı "Rusiye Federatsiyası Silâlı quvetleriniñ itibardan tüşürüvi" ve "natsist timsalleriniñ teşviqatı" içün eki "memuriy protokol" tizdiler, bundan soñ 10 künge qadar apiske aldılar ve 50 biñ ruble para cezasını aldı.
Ukraina prezidentiniñ Qırım Muhtar Cumhuriyetindeki temsilciligi, boş aynıñ 7-nde Gemeci ve Kâmilevniñ evinde keçirilgen tintüvni takbih etti.
İşğal etilgen Qırımda advokatlarnıñ taqipleri
2023 senesi orta küz ayınıñ 13-nde ruslar advokat Oleksiy Ladinni tuttılar. Tintüv ve yaqalav vaqtında ondan advokat sırını taşığan malümat alındı. Ladin 14 künge "yasaqlanğan timsallerni numayış etkeni" içün apiske alındı ve içtimaiy ağda cenkke qarşı yazısı içün para cezasını aldı. Qırımnıñ işğalli polisi apiske alınğan advokatnıñ uquqiy faaliyet litsenziyasını lâğu etmege rica etti.
2022 senesi arman ayında Çeçenistan Advokatlar palatası qırım advokatları Lilâ Gemeci, Rustem Kâmilev ve Nazim Şeyhmambetovnı ihtisasiy statusından marum etti. Bu sebepten olar cinaiy işlerde iştirak etip olamaylar.
2022 senesi mayıs ayında işğalciler eki imayecini tuttılar: Emine Avamileva beş kün apiske alındı, Ayder Azamatov sekiz künge apiske alındı. Ekisi de makemege Nazim Şeyhmambetovnı qorçalamaq içün kelgenlerinde yaqalandı.
2023 senesi mayısnıñ 26-nda işğal etilgen Qırımda "makeme" advokat Edem Semedlâyevni "Rusiye Silâlı quvetleriniñ itibarını tüşürüvde" qabaatlı tanıdı. Advokat 75 biñ ruble para cezasını aldı.
Advokat Emil Kurbedinovnı kiçik aynıñ 15-ne qadar eki kere tuttılar: 2017 ve 2018 seneleri.
2023 senesi çiçek ayınıñ 15-nde işğalciler qırım advokatları Lilâ Gemeci ve Rustem Kâmilevniñ advokatlıq litsenziyasını lâğu ettiler, şunıñ içün olar öz imayesi altındaki şahıslarnı cinaiy davalarda qorçalap olamay, olarnıñ menfaatlarını makemege qadar taqiqat ve makemelerde temsil etip olamay. Olarnıñ arasında 13 qırım siyasiy mabüsi bar.
Telegram, WhatsApp ve Facebookta Suspilne Qırım haberlerine abune oluñız