Uquq qorçalayıcılar boş aynıñ 7-nde işğal etilgen Qırımda uquqçılar Lilâ Gemeci ve Rustem Kâmilevniñ evinde keçirilgen tintüv ve bundan soñ Kâmilevniñ eki "memuriy protokol" içün apiske alınması ve para cezasını ödegeni sebebinden umumiy beyanatnı bildirdiler. Olarnıñ qayd etkenlerine köre, uquq qorçalayıcılarnıñ taqip etilüvi, işğalli akimiyet tarafından, faaliyetini toqtatmaq ya da işğalcilernen işbirlik yapmaq içün yapılğan sistematik bir arekettir.
Böyle bir beyanatnı "QırımSOS" cemaat teşkilâtı boş aynıñ 8-nde derc etti.
Böylece, uquq qorçalayıcılar halqara teşkilâtlarğa ve çetel ükümetlerine aşağıdaki talaplar ile muracaat ettiler:
- Qırımdaki Gemeci, Kâmilev ve başqa advokatlarğa qarşı repressiyalarnı takbih etip, işğalli akimiyetten olarnıñ qanunsız taqip etilüvini toqtatmasını talap etmek.
- Yarımadada insan aqlarınıñ bozuluvı içün mesüliyetli olğanlarğa, hususan, "Aşırıcılıqqa qarşılıq merkezi", "makemeler" ve "taqiqatçılar" hadimlerine qarşı şahsiy sanktsiyalarnı kirsetmek, olar Qırımda advokatlarnı siyasiy taqip eteler.
- Advokatlarğa, uquq qorçalayıcılarğa, faalcilerge ve zenaat faaliyetleri içün taqip etilgenlerniñ qorantalarına destek köstermek.
- İşğal etilgen yarımadada insan aqları vaziyetiniñ nezaretini devam ettirmek, qabaatlılarnıñ mesüliyetke çekilmesine yardım etmek içün insan aqları bozuluvlarını ve arbiy cinayetlerni qayd etmek.
Hatırlatamız ki, boş aynıñ 7-nde Rustem Kâmilev ve daa bir advokat Lilâ Gemeciniñ evinde İşğalli Aşırıcılıqqa qarşılıq merkeziniñ hadimleri tintüv keçirip, Kâmilevni tuttılar.
İşğalciler oña qarşı "Rusiye Federatsiyası Silâlı quvetleriniñ itibardan tüşürüvi" ve "natsist timsalleriniñ teşviqatı" içün eki "memuriy protokol" tizdiler, soñra ise 10 künge apiske aldılar ve 50 biñ ruble para cezasını berdiler.
Aynı zamanda Ukraina prezidentiniñ Qırım Muhtar Cumhuriyetindeki temsilciligi boş aynıñ 7-nde Gemeci ve Kâmilevniñ evinde keçirilgen tintüvlerni takbih etti.
İşğal etilgen Qırımda advokatlarnıñ taqipleri
2023 senesi orta küz ayınıñ 13-nde ruslar advokat Oleksiy Ladinni tuttılar. Tintüv ve yaqalav vaqtında ondan advokat sırını taşığan malümat alındı. Ladin 14 künge "yasaqlanğan timsallerni numayış etkeni" içün apiske alındı ve içtimaiy ağda cenkke qarşı yazısı içün para cezasını aldı. Qırımnıñ işğalli polisi apiske alınğan advokatnıñ uquqiy faaliyet litsenziyasını lâğu etmege rica etti.
2022 senesi arman ayında Çeçenistan Advokatlar palatası qırım advokatları Lilâ Gemeci, Rustem Kâmilev ve Nazim Şeyhmambetovnı ihtisasiy statusından marum etti. Bu sebepten olar cinaiy işlerde iştirak etip olamaylar.
2022 senesi mayıs ayında işğalciler eki imayecini tuttılar: Emine Avamileva beş kün apiske alındı, Ayder Azamatov sekiz künge apiske alındı. Ekisi de makemege Nazim Şeyhmambetovnı qorçalamaq içün kelgenlerinde yaqalandı.
2023 senesi mayısnıñ 26-nda işğal etilgen Qırımda "makeme" advokat Edem Semedlâyevni "Rusiye Silâlı quvetleriniñ itibarını tüşürüvde" qabaatlı tanıdı. Advokat 75 biñ ruble para cezasını aldı.
Advokat Emil Kurbedinovnı kiçik aynıñ 15-ne qadar eki kere tuttılar: 2017 ve 2018 seneleri.
2023 senesi çiçek ayınıñ 15-nde işğalciler qırım advokatları Lilâ Gemeci ve Rustem Kâmilevniñ advokatlıq litsenziyasını lâğu ettiler, şunıñ içün olar öz imayesi altındaki şahıslarnı cinaiy davalarda qorçalap olamay, olarnıñ menfaatlarını makemege qadar taqiqat ve makemelerde temsil etip olamay. Olarnıñ arasında 13 qırım siyasiy mabüsi bar.
Telegram, WhatsApp ve Facebookta Suspilne Qırım haberlerine abune oluñız