Перейти до основного змісту
İşğalciler advokat Kâmilevge qarşı eki "memuriy protokol" tizdiler

İşğalciler advokat Kâmilevge qarşı eki "memuriy protokol" tizdiler

Advokat Rustem Kâmilev
Advokat Rustem Kâmilev. Кримська солідарність

Qırımda advokat Rustem Kâmilevge qarşı eki memuriy protokol tizildi. Bundan evel, boş aynıñ 7-nde, onıñ ve daa bir advokat Lilâ Gemeciniñ evinde İşğalli Aşırıcılıqqa qaşrılıq merkeziniñ (AQM) hadimleri tintüv keçirip, Kâmilevni yaqaladılar. Ukraina işğalcilerniñ bu areketlerini takbih etti.

Bunı "Qırım birdemligi" cemaat teşkilâtı bildirdi.

Rustem Kâmilevni alâ daa azat etilmedi. Boş aynıñ 7-nde ya da 8-nde "makeme" oturışı keçirile bile, amma cemaat jurnalistleri daa tafsilâtlı malümat bermey.

Advokatnıñ birinci "memuriy protokolı" Rusiye Federatsiyasınıñ Memuriy cinayetler qanunnamesiniñ 20.3 maddesine binaen tizildi: "Natsist atributları ya da timsallerini halq ögünde kösterüv ya da olarnıñ teçviqatı".

Söz, 2020 senesi "Qırım birdemligi"niñ siyasiy mabüs Oleh Prıhodkonen bağlı "makemesi" aqqında maruzasınıñ Facebooktaki repostı aqqında kete. "Makeme" zalında qara-qırmızı fonda Ukraina tamğasınen öz qolunen yapılğan plakatnı tutqan çıraqnı "mütehassıs" qararına köre, "Pravıy sektor" teşkilâtınıñ timsali olaraq adlandıralar.

Ekinci protokolda Rusiye siyasetçisi Grigoriy Yavlinskiyniñ 2017 senesi yazğan mektübi aqqında aytıla, mektüpte matbuat konferentsiyasınıñ videosı bar edi. Anda o şunı ayttı: "Suriye cenki, Ukrainadaki kibi, Rusiye içün qavmiy felâkettir... "

İşğalli AQMniñ vekilleri, advokat Kâmilev bu yazını tarqatıp, RF Silâlı quvetleriniñ areketlerine qarşı çıqqanını bildirdi, dep iddia eteler. Onıñ içün bu protokolğa binaen onı Rusiye Memuriy uquq bozuvları qanunnamesiniñ 20.3.3 "Rusiye Silâlı Quvetlerini itibardan tüşürüv" maddesine binaen qabaatlaylar.

Ukraina prezidentiniñ Qırım Muhtar Cumhuriyetindeki temsilciligi, Kâmilev ve Gemeciniñ evlerinde keçirilgen tintüvlerni takbih etti.

"Böyle sistemli areketler ve "çözümler" tek işğalciler tarafından siyasiy sebeplerden taqip etilgen şahıslarğa qol tutmaqnı eksiltmek, soy-soplarını, tuvğanları ya da semetdeşleriniñ aq-uquqları ve serbestligini qorçalağan ve işğalli akimiyetniñ areketlerini aydınlatqan jurnalist ve faalcilerni qorquzmaq içün yapıldı", — dep bildirildi.

Temsilcilik, işğalciler tarafından zarar körgen uquq qoruyıcılarğa da destek kösterdi.

"Ukraina Qırımnı işğalden azat etmek ve vatandaşlarımıznıñ aq-uquqları ve serbestligini bozuvda qabaatlı olğanlarnı mesüliyetke çekmek içün elinden kelgenini yapacaq", — dep Temsilcilik qayd etti.

Telegram, WhatsApp ve Facebookta Suspilne Qırım haberlerine abune oluñız

Топ дня
Вибір редакції
На початок