Qırımda işğalciler uydurılğan «Hizb ut-Tahrirniñ birinci qadın davası»nıñ iştirakçileriniñ apiste tutuv müddetini uzattılar. Rusiye siyasiy mabüslerni — çoq balalı anası Esma Nimetulayeva, Fevziye Osmanova, Elvize Aliyeva ve Nasiba Sayidovanı — eñ az orta küz ayınıñ 14-ne qadar apiste qaldıracaq.
Nasiba Sayidovanıñ anası Dinara İyupova Facebookta bunı bildirdi.
«İlk küz ayınıñ 8-nde Bağçasaray rayonından "Hizb ut-Tahrir davası"nda qızlarımıznıñ tevqif müddeti 14.10.2026 senesine qadar uzatıldı. Bugün akimiyetni ve devletni qorquzğan şahıslar — devlet universitetlerinde oquğan 19-20 yaşlarındaki külümsegen qızlar ve beş qıznı yetiştirgen çoq balalı ana. Amma biz, soy-soplar, yaqınlar ve çoq azap çekken halqımız, bu ağırlıqtan soñ yımşatuv olacağına inanamız. Allah qızlarımızğa bu sınavlardan keçmege yardım etecek», — dep yazdı Dinara ve işğalli mahkemege konvoy ile ketken qız-qadınlarnıñ fotoresimini derc etti.
Hatırlatamız ki, daa evel Suspilne Qırımğa Qırımdaki uquq qorçalayıcılardan menbaları bildirdi ki, işğalciler Rusiye quvetçileri tarafından «Hizb ut-Tahrir» faaliyetinde qabaatlanğan Bağçasaraylı dört qırımtatar qız-qadınınıñ davasınıñ mahkemeden evelki tahqiqatını bitirdi. İlk küz ayınıñ 5-nden itibaren olar cinaiy dava malümatlarınen tanış olmağa başladılar.
Menbalarnıñ aytqanına köre, Rusiye Federatsiyasınıñ Ceza qanunnamesiniñ «Hizb ut-Tahrir» faaliyetine alâqası olğan 205.5-nci maddeterror teşkilâtnıñ faaliyetini teşkil etüvsinden ğayrı, qadınlar da akimiyetni zorbalıqnen zapt etüvge azırlanalar — Rusiye Federatsiyasınıñ Ceza qanunnamesiniñ 30-ıncı maddesiniñ 1-inci qısmı ile birleşken 278-inci maddesi.
İşğal etilgen Qırımda Rusiye quvetçileri tarafından «Hizb ut-Tahrir» ile alâqası bar olğanında qabaatlanğan qadınlarnen bağlı açılğan ilk cinaiy dava oldı.
Esma Nimetulayevanıñ advokatınıñ qayd etkenine köre, tedbir aluv oturışında FSB taqiqatçısı şübelengenler «delillerni saqlay ve yoq ete bile» degen argumentlerni seslendirdi.
Elviza Aliyevanıñ imayecisi bildirdi ki, onıñ imayesi altında bulunğan şahıslar iç bir vaqıt memuriy mesüliyetke çekilmegenini qayd etti. Aynı zamanda FSB taqiqatçısı, gizli şaat Aliyevanı «terroristik taqımnıñ iştirakçisi olaraq kösterdi».
2025 senesi orta küz ayınıñ 15-nde qırımtatar qadınlarınıñ apiske alınması aqqında ne bilemiz
Orta küz ayınıñ 15-nde saba işğalciler Qırımda dört qırımtatar qadınını tuttılar.
Birinciden Bağçasarayda bir qaç balanıñ anası ve siyasiy mabüs Remzi Nimetulayevniñ apayı Esma Nimetulayeva tutuldı.
Aynı rayonnıñ Holmivka (Zalanköy) köyünde işğalciler bala bağçasında terbiyeci olıp çalışqan pedagogika kolleciniñ studenti Nasiba Saidovanıñ evini tinttiler. Dolınnede (Topçıköyde) quvetçiler Elviza Aliyevanıñ evine kirdiler, Orlivkada (Mamaşayda) ise Fevziye Osmanovanıñ evini tinttiler.
Tutulğanlarnıñ episi Simferopoldaki (Aqmescitteki) FSB idaresiniñ binasına ketirildi ve olarğa Rusiyede yasaq etilgen "Hizb ut-Tahrir" teşkilâtında iştirak etkenleri aqqında madde boyunca şübe bildirildi. Rusiyeniñ "RİA Novosti" devlet agentligi, işğalli FSBge atıf etip, tutulğan qadınlar "Qırım musulmanları arasında dünya halifeliginiñ ideologiyasını tarqatqanı" aqqında bildirdi.
Orta küz ayınıñ 16-nda Qırımnıñ işğalli Kıyiv rayon mahkemesi olarnı eki ayğa apiske aldı. Apiske alınğan qadınlarğa qarşı qorçalayıcı tedbirlerniñ saylanuvı boyunca bütün dört oturış qapalı şekilde keçirildi. Advokat Emil Kurbedinovnıñ aytqanına köre, bütün qadınlar işğal etilgen Simferopoldaki (Aqmescitteki) 1-nci SİZOda tutulacaq. Onıñ malümatına köre, Esma Nimetulayeva işğalciler tarafından Rusiye Ceza qanunnamesiniñ 205.5-nci maddesiniñ 1-inci qısmı (terror teşkilâtınıñ faaliyetini teşkil etüv) boyunca qabaatlana, diger apiske alınğan qadınlar ise aynı maddeniñ 2-nci qısmı (terror teşkilâtında iştirak etüv) boyunca qabaatlanalar.
Esma Nimetulayeva — beş balanıñ anası, 2023 senesi arman ayınıñ 23-nde işğalciler tarafından tutulğan ve Hizb ut-Tahrir davasınıñ beşinci Bağçasaray gruppasınıñ siyasiy mabüsi Remzi Nimetulayevniñ apayıdır.
Nasiba Saidova — pedagogika kolecinde oquğan, bala bağçasınıñ bebek gruppasında çalışqan qız, dep "Qırım birdemligi" bildirdi.
Fevziye Osmanova — tükân hadimi, onıñ evi Bağçasaray rayonınıñ Orlivka köyünde yerleşe.
Elviza Aliyeva Simferopoldaki (Aqmescitteki) fırında kasiyer olıp çalıştı, Qırım federal universitetiniñ dörtünci kursında "Menecment" ihtisasını ala.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Hatırlatamız ki, işğal etilgen Qırımda Rusiye quvetçileri siyasiy mabüs Nasiba Sayidovanıñ babası olğan imam Sadık Urinbayevge qarşı memuriy dava açtılar. O, işğalli Musulmanlar diniy idaresinde tasdıq vesiqası olmadan Cuma namazını qılıp keçirgeninde qabaatlana.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
