Orta küz ayınıñ 15-nde saba maalinde Qırımda işğalciler dört qırımtatar qadını tuttılar. Episileri Simferopoldaki (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adteki) "RF FSBniñ Qırım Cumhuriyeti ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeerindeki idaresi"ne alıp kettiler.
Qırımtatar Milliy Meclisiniñ reisi Refat Çubarov bu aqqında haber berdi.
"Qırım birdemligi", qırımtatar qadınlarınıñ evleri tintilgenini bildirdi.
"Bağçasaray rayonınıñ Holmivka köyünde Nasiba Saidovanıñ evi tintildi. Aynı şu rayonnıñ Dolınne köyünde Elviza Aliyevanıñ evi tintildi", — dep bildirildi.
Bundan ğayrı, Orlivka köyünde Fevziye Osmanovanıñ evi tintildi. Siyasiy mabüs Remzi Nimetulayevniñ apayı Esma Nimetulayeva ilk tutuldı.
"Evel evler ayrı vaziyetlerde tintilgen olsa da, 2022 senesinden soñ çoq insan olarnı turmuş ayatınıñ adiy qısmı olaraq körip başladı. İnsanlarnıñ şahsiy boşluğına böyle adaletsiz qarışmasını qaçanılmaz yamanlıq olaraq körmege alıştıra", — dep Facebookta "Qırım birdemligi"niñ uquq qorçalayıcısı, "Gratı" portalınıñ müellifi Lütfiye Zudiyeva yazdı.
Bundan ğayrı, o, Esma Nimetulayeva nasıl tutulğanını añlattı.
"Olar maña şunı dediler: "Siz torunlarıñıznen qartana olaraq qalasız, vasiylik resmiyleştire bilesiz. Vasiy olmasa, devlet balalarnı ala bilir". Men ise cevap berdim: "Men torunlarımnı kimsege bermem". Titüv vaqtında men özümni yaramay duydım, Esma maña ilâc berdi, balalar sakinleştiler. Men olarğa sual berdim: "Ne içün öyle yapasız? Canlı ana-babası olğan balalarnı öksüz ettiresiz. Olar sizge ne yaptılar? Olar sadece dinini küteler" — dep Lütfiye Esmanıñ anasınıñ sözlerini añlattı.
"Qırım birdemligi"niñ yazğanına köre, siyasiy mabüs Remzi Nimetullayevniñ 68 yaşındaki anası Hatice Nemetulayevanıñ sesi telâşlandı, eşitüvi fenalaştı.
"Böylece evimizni kene tintmege keldiler. Amma olar bir şey tapmadılar. İman ve ümütnen yaşaycaqmız, balalarımıznıñ, apishanelerde bulunğanlarnıñ (oğlum Rostovda) terrorist olmağanını bilemiz. Halqımıznıñ iç bir vaqıt terroristleri olmadı. Bizim balalarımıznıñ musulmanlarğa qarşı bir şey yapqanına dair iç bir şikâyet yoq. Olar sadece din adamları, cemiyetimizniñ itibarlı azalarıdır. Ebet, biz yalıñız dinimizge riayet etkenimiz, namuslı olğanımız, yalan aytmağanımız, hırsızlıq yapmağanımız içün qabaatlımız. Biz er şeyni olğanı kibi köremiz — aqiqiy ve adaletli. Menimce, bu akimiyetni raatsızlatqan şey. Amma biz Yüce Allahnıñ bergeni sınav labirintlerinden itibar ve namusne keçecekmiz", — dep Hatice Nimetulayeva qoştı.
Tutulğanlar aqqında ne bilemiz
Esma Nimetulayeva — beş balanıñ anası, 2023 senesi arman ayınıñ 23-nde işğalciler tarafından tutulğan ve Hizb ut-Tahrir davasınıñ beşinci Bağçasaray gruppasınıñ siyasiy mabüsi Remzi Nimetulayevniñ apayıdır.
Nasiba Saidova — pedagogika kolecinde oquğan, bala bağçasınıñ bebek gruppasında çalışqan qız, dep "Qırım birdemligi" bildirdi.
"Fevziye Osmanova ve Elviza Aliyeva — bekâr qızlar, olarnıñ qorantalarınen daa yaqın tanış olmaq kerek", — dep Lütfiye Zudiyeva yazdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
