Rusiye tarafından uydurılğan dava boyunca qanunsız şekilde 15 yılğa mahküm etilgen Qırım ressamı Boğdan Ziza, Rusiyeniñ Burât Ulusındaki Ulan-Ude şeeriniñ 8-nci müstemlekesine avuştırıldı.
Boğdan Ziza öz mektübinde bunı bildirdi, dep haber etti Facebookta Ukrayina Prezidentiniñ Qırım Muhtar Cumhuriyetindeki temsilciligi.
Mektüpte o, müstemlekege kelgen soñ 10 künge ceza izolâtorına qapatılğanını tarif etti.
"Ceza izolâtorında bulunam, adımnı yañlış aytqanım içün. On kün berdiler. Yañı bir yerde izolâtorda yaşamağa başlamaq ananem ola", — dep yazdı o.
2022 senesi mayıs ayında Boğdan Ziza Qırımdaki Rusiye Federatsiyasınıñ Ukrayinağa istilâsına qarşı narazılıq aktsiyasını keçirdi — Yevpatoriyadaki (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addeki) Rusiye işğalli memuriyetiniñ binasını sarı ve mavı boyalarnen — Ukrayina bayrağınıñ renklerine — boyadı, soñra ise içine patlayıcı malzemenen şişe attı. Bir qaç künden soñ onı tutıp aldılar.
"Boğdan tutulğanda, "terrorizm" qabaatlavlarında qabaatını itiraf etmesi içün, oña fizikiy ve ruhiy basqı yapıldı. 2023 senesi ilk yaz ayında Rostov-na-Donudaki Rusiye mahkemesi onı sert rejimli müstemlekede 15 yılğa üküm etti. Bu üküm Qırımda ukrayinlerge qarşı siyasiy sebeplerden yapılğan repressiyalarnıñ daa bir delili oldı", — dep qayd etti Temsilcilik.
Boğdan Ziza aqqında ne bilemiz
2022 senesi mayıs ayınıñ 20. künü qırım ressamı ve faalcisi Boğdan Zizağa qarşı "terror aktını yapmağa ıntıluvı" aqqında cinaiy dava açıldı. Onı şübeleyler ki, mayıs ayınıñ 16. künü işğalli şeer memuriyetiniñ binasını boyanen boyaladı ve onı yaqmağa tırışqan.
Bozarğan aynıñ 6. künü Rostov-na-Donudaki Cenübiy bölge arbiy makemesi qırım ressamı ve faalcisi Boğdan Zizanı 15 senege maküm etti.
Bozarğan aynıñ 10. künü Ziza açlıq ilân etti. O, rusiye vatadaşlığından marum etmesini ve ukrain siyasiy mabüslerini azat etmesini talap etti. Bozarğan aynıñ 27. künü açlıq çekmege bitirdi.
Ukrain repçisi Artem Loik, 15 senege maküm etilgen ressam ve faalcini destek etmek içün video çıqardı, çünki Ziza soñ sözüni aytqanda repçiniñ "Krıla" ("Qanatlar" - terciman) yırından sözlerni qullandı.
Qırımda apis etilgen Kezlevli ressam Boğdan Zizanıñ şerefine ukrain ressamları trenni resimlernen yaraştırdılar.
2023 senesi berim ayınıñ 27. künü Vlasıha şeerindeki Arbiy apellâtsiya makemesi, qırım ressamınıñ 15 senelik ükümini deñiştirmeyip qaldı.
Boş aynıñ 12. künü siyasiy mabüsniñ mektüp dostu ondan mektüp alıp haber berdi ki, Boğdan Ziza Perm şeeriniñ 29. müstemlekesine etap etile. Bundan evel arqabaları, etap devrinde qayda bulunğanını bilmegen ediler.
Daa evel Qırım siyasiy mabüsi Boğdan Zizanıñ qardaşı Oleksandra Barkova "PRO Qırım. 2.0" podkastında onıñ qarşılıq ve Rusiye esirliginden azat etilmesi içün küreş tarihı aqqında tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
