Rusiyeniñ Rostov-na-Donu şeerindeki Cenübiy bölgeniñ arbiy mahkemesi Ali Mamutov, Enver Halilayev, Nariman Ametov, Vohid Mustafayev ve Remzi Kurtnezerovnı 14 yıldan 20 yılğa qadar apis cezasına üküm etti. Olarnıñ episi "Hizb ut-Tahrir davası"nıñ üçünci Canköy gruppasınıñ mabüsleridir.
Mayısnıñ 21-nde "Qırım birdemligi" cemaat teşkilâtı bu aqqında haber etti.
Siyasiy mabüslerniñ tuvğanlarınıñ aytqanlarına köre, mahkeme esnasnı birden tezleştirdi ve bir künde taraflarnıñ munaqaşalarından üküm çıqarılmasına keçti.
Mahkeme tek üç saat devam etti, dep sabıq imam Remzi Kurtnezirovnıñ qızı Emine İslâmova tarif etti. Onıñ vaqtında prokurorlıq 17-21 yılğa qadar apis cezasını istedi. Bugün oturış saat 10:00-da başlandı.
"Saat 14:00 advokatqa yazdım, o, oturış devam etkenini ayttı. Onı evge qaytaracaqlarını soradım. Advokat dedi ki, bugün soñki sözüni aytmasa, qaytar. Daa soñra o yazdı ki, mahkemeciler acele areket etkenleri içün onı, ğaliba, qaldıracaqlar, ve üküm saat 19:00-da ilân etilecek", — dep o ayttı.
Lobanovo köyündeki caminiñ sabıq imamı Remzi Kurtnezirov, üç kere felçke oğrağan, qafa travması alğan, şeker hastalığı ve gipertoniyası olğan, sağından felç ve saqatlıq sebebinden ev apsinde buluna edi. O, istinaf şikâyetine qadar evde qalacaq. Qalğan mabüsler Rostov-na-Donu SİZOtaqiqat izolâtorısında tutula.
Aynı zamanda qırımtatar faalcileri qayd ettiler ki, apis cezalarınıñ birden ilân etilmesi cemaat diqqatını eksiltmek ve birdemlik numayışlarını sıñırlamaq içün yapıla.
"Bu üküm bir telüke kibi. Camige barıp, çeşit mevzularda laf etesiñiz, bir qaç sesli videoñız bar — ve siz "terrorist"siñiz. Siziñ apis müddetiñiz, silâ alıp öldürgenniñ apis müddetinen aynıdır. Kiçik Qırımda, kiçik halq arasında er kes bu insanlarnıñ terrorist olmağanını bile. Bu sebepten böyle tevqifler er kes içün telüke olaraq qabul etile", — dep faalci bildirdi.
Mayısnıñ 20-nde Rusiye prokurorı "Hizb ut-Tahrir davası"nıñ üçünci Canköy gruppasınıñ mabüslerine 17 yıldan 21 yılğa qadar apis cezasını istedi. Sabıq imam Remzi Kurtnezirovğa 21 yıl, diger qırımtatarlar Mustafayev, Ametov, Mamutov ve Halilâyevge 17-18 yıl qadar apis cezasını istedi.
"Hizb ut-Tahrir davası"nıñ üçünci Canköy gruppası aqqında ne bilemiz
2024 senesi martnıñ 5-nde saba Qırımnıñ Bağçasaray ve Canköy rayonlarında Rusiye quvetçileri on qırımtatar adamınıñ evini tinttiler.
Aynı künü "makeme" dört qırımtatar faalcisini - Memet Lümanov, Aziz Azizov, Rustem Osmanov ve Mustafa Abduramanovnı yaqaladı. Olarnı 2024 senesi mayısnıñ 4-ne qadar 2. SİZOsına yolladılar.
Martnıñ 6-nda işğalli makeme 6 qırımtatar faalcisine tevqif tedbirlerini belgiledi. Sabıq imam Remzi Kurtnezirovğa ev apsi şeklinde tevqif tedbirini saylamaq qararı çıqarıldı. Amet Nariman, Ali Mamutov ve Arsen Kaşka, Enver Halilayev ve Vahid Mustafayevge işğalli mahkeme bu sene mayısnıñ 5-ne qadar SİZOda tutuv şeklinde tedbir aldı.
Er kesni "Hizb ut-Tahrir" islâm siyasiy firqasında iştirak etmege red eteler. Apiske alınğanlarnıñ çoqusı — çoq balalı babalardır.
Aqmescitniñ Kıyiv bölge makemesi çiçek ayınıñ 25-nde "Hizb ut-Tahrir davasınıñ" üçünci Canköy gruppasınıñ mabüslerini apiske almağa devam ettirdi. Olar Canköy ve Canköy rayonından qırımtatarlar - Enver Halillayev, Nariman Ametov, Ali Mamutov, faalci Arsen Kaşka ve Lobanovo köyündeki caminiñ imamı Vahid Mustafayev. Olar arman ayınıñ 3-ne qadar Aqmescitteki 2. SİZOda qalacaqlar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
