İşğal makemesi, tintüvlerden soñ tutulıp qapatılğan qırımtatar adamlarına qorçalayıcı tedbirni sayladı: ne bilemiz

İşğal makemesi, tintüvlerden soñ tutulıp qapatılğan qırımtatar adamlarına qorçalayıcı tedbirni sayladı: ne bilemiz

Оновлено
İşğal makemesi, tintüvlerden soñ tutulıp qapatılğan qırımtatar adamlarına qorçalayıcı tedbirni sayladı: ne bilemiz
Saban ayınıñ 5-inde tutulıp qapatılğan qırımtatar faalcileri ve diniy erbaplar. Фото: колаж Суспільне Крим

İşğal etilgen Aqmescitteki Kıyiv rayon makemesi, saban ayınıñ 5-inde işğal etilgen Qırımda yañı kütleviy tintüvlerden soñ rus quvetçileri tarafından tutulıp qapatılğan altı qırımtatar faalcisine ve diniy erbapqa qorçalayıcı tedbirni sayladı.

“Qırım birdemligi” bu aqqında haber berdi.

Bildirildi ki, bütün makeme oturışları qapalı şekilde keçirildi. Yaqınları resmiy rica yazğanlarına baqmadan bile olarnı yibermediler.

Eski imam Remzi Kurtnezirovğa ev tevqifi şeklinde qorçalayıcı tedbir saylandı.

"Kurtnezirovnıñ bir qaç ağır hastalığı bar. Bu hastalıqları sebebinden apishanede bulunamaz. Makeme, bütün hastalıqlarına diqqat celp etip, Kurtnezirovğa bir ay ve 20 künge, yani bu sene mayıs ayınıñ 4-üne qadar, ev tevqifi şeklinde qorçalayıcı tedbirni sayladı", — dep advokat Safiye Şabanova, işğal etilgen makemeniñ qararını tefsir etti.

Makeme, faalci Ali Mamutovğa bu sene mayıs ayınıñ 4-üne qadar SİZOda tevqif etmege üküm çıqardı. Qorçalayıcı tarafnıñ apellâtsiya şikâyetnamesini bermege niyeti bar, çünki makemeniñ üküminen razı olmay.

"Onıñ bir qaç hastalığı bar olağanını köstergen tibbiy vesiqalarnı kösterdik. Faqat makeme olarğa diqqat celp etmedi", — dep Safiye Şabanova añlattı.

İşğal makemecisi, Nariman Ametovğa 1 ay ve 29 künge, yani bu sene mayıs ayınıñ 5-ine qadar, tevqif etmege üküm çıqardı. Advokatlarnıñ sözlerine köre, Ametov qabaatını tanımadı, qorçalayıcı tarafnıñ apellâtsiya şikâyetnamesini bermege niyeti bar

İşğal makemesi Arsen Kaşka, Enver Halilaev ve Vayit Mustafaevge bu sene mayıs ayınıñ 5-ine qadar SİZOda tevqif etmege qarar berdi.

"10 senedir bular, bir-birine beñzegen davalardır. Böyle diniy ve siyasiy sebeplerden faalciler, diniy erbaplar ve içtimaiy jurnalistlerni taqip eteler. "Hizb ut-Tahrir" teşkilâtında iştirak etüv aqqında laf etemiz. Ve bugün makeme oturışında FSB işçileri, qorçalağanımız adamlar şaatlarğa tesir ete bilirler, dep eñ şiddetli qorçalayıcı tedbirni rica ettiler. Olardan biri cinayetçi degil, çoqtan bunı bilemiz", — dep advokat Emil Kurbedinov qayd etti.

Hatırlatamız ki, saban ayınıñ 5-inde işğal etilgen Qırımda yañı kütleviy tintüvler dalğası keçti. Bağçasarayda "Qırım birdemligi"niñ faalcileriniñ evlerinde, Canköy rayonında diniy erbaplarının evlerinde taqiqat tedbirleri keçirildi.

Birazdan işğal etilgen Aqmescitteki Kıyiv rayon makemesi Memet Lümanov, Aziz Azizov, Mustafa Abduramanov ve Rustem Osmanovnı 2024 senesi mayıs ayınıñ 5-ine qadar tevqif etmege üküm çıqardı.

Umumen saban ayınıñ 5-inde saba maalinde işğal etilgen Qırımda evler tintilgen ve insanlar tutulğan soñ 24 bala babasız qaldı.

Remzi Kurtnezirov — eski imam, vaqtınca işğal etilgen Qırımnıñ Canköy rayonında yaşay. Yürek hastalığı ve şekerli diabetni çeke. Qafa tasınıñ trepanatsiyasından soñ müddetsiz 2 gruppalı saqatlıdır. Sağlıq alı sebebinden namaz qılmağa bitirdi.

Enver Halilaev — kütleviy iftarlarnıñ teşkilcisi, siyasiy sebepli davalarnıñ makeme oturışlarına sıq sıq bara. Canköy rayonında yaşay ve areket etemegen anasına baqa.

Vayit Mustafaev — Canköy rayonınıñ Cadra köyünde imam, işğal etilgen QMDİniñ azası olmay.

Arsen Kaşka — qırımtatar halqınıñ vekili ve faalci. Siyasiy sebepli davalarnıñ makeme oturışlarına bara. Canköy rayonınıñ İlk Çoqraq köyünde yaşay.

Memet Lümanov — "Qırım birdemligi"niñ faalcisi. Bağçasarayda siyasiy mabüslerniñ ailelerini içtimaiy-yaşayış meselelerinde destek ete, Qırım ve Rostov-na-Donudaki makeme oturışlarına bara.

Rustem Osmanov — qırımtatar telekanalı ATRniñ eski işçisi. Bağçasarayda yaşay. 2014 senesinden soñ siyasiy sebepli davalarnıñ makeme oturışlarına sıq sıq bara, siyasiy mabüslerniñ ailelerine yardım ete.

Aziz Azizor — “Qırım birdemligi"niñ strimeri. Qarçığa ve tamir işleri ustası.

Ali Mamutov — qırımtatar halqınıñ vekili, qurucı, iftarlarda aşçının yardımcısı. Canköy rayonınıñ Paharevka köyünde yaşay. Qırım siyasiy mabüsleriniñ makeme oturışlarına bara.

Nariman Ametov — qırımtatar halqınıñ vekili, qurucı. Canköyde yaşay.

Mustafa Abduramanov — "Qırım birdemligi"niñ faalcisi. Siyasiy mabüslerniñ ailelerine içtimaiy-yaşayış meselelerinde yardım ete, apaylarını Rostov-na-Donuğa makeme oturışlarına alıp kete.

Telegram ve Facebookta Suspilne Qırım haberlerine abune oluñız

На початок