Poloniya ve Belarusiye arasındaki deñiştirüv çerçivesinde Poloniya apishanesinden azat etilgen Rusiye arheologı Aleksandr Butâgin işğal etilgen Keriçteki qanunsız qazma işine qaytacaq.
RİA "Novosti" agentligine Keriçteki işğal etilgen Şarqiy-Qırım tarihiy-medeniy qoruq-müzeyiniñ "müdiri" Tatyana Umrihina bunı bildirdi.
"OAeksandr Butâgin bu mevsimde kene Şarqiy Qırımda Karantin missiyasında Mirmekiy Ermitajınıñ arheologik ekspeditsiyasına yolbaşçılıq etecek", — dep Umrihina agentlikke ayttı.
Ukrayinada Butâgin qanunsız qazmalarda şübelene. Yaqında Ukrayinada Rusiye arheologı Aleksandr Butâginniñ qabaatlavı Ukrayina Ceza qanunnamsiniñ 438-inci maddesine deñiştirildi. O cenk cinayetleri içün mesüliyetke çekilmesini közde tuta. Daa evel oña qarşı cinaiy dava UCQniñ 298 maddesi boyunca açılğan edi.
O, ilk qış ayınıñ 4-nde Felemenkten Poloniya üzerinden Balkanlarğa ketkende Poloniya mahsus hızmetleri tarafından yaqalandı. Poloniya mahkemesi Ukrayinanıñ Rusiye arheologı Aleksandr Butâginniñ ekstraditsiya talabını qanaatlendirdi, amma çiçek ayınıñ 28-nde onı Poloniya ve Belorusiye arasındaki deñiştirüv çerçivesinde Rusiyege qaytardılar. Ukrayina Tış işler nazirligi bildirdi ki, o deñiştirilgen soñ, "Rusiye tarafı bu siyasiy-uquqiy epizodnı Qırım işğali ve vaqtınca işğal etilgen ukrayin toprağınıñ Rusiye vatandaşları tarafından qullanılmasını aqlamaq içün tsinik şekilde qullanacaq". Bunen beraber, ukrayin tarafı Butâginniñ mesüliyetke çekilmesi içün çalışmağa devam etecek, dep qoştılar.
Daa evel Butâgin "Vesti" Rusiye kütleviy haber vastasına bergen intervyusında işğal etilgen Keriç civarındaki Mirmek arheologik ekspeditsiyasınıñ reberligine qaytmaq niyetini bildirdi.
Aleksandr Butâgin kimdir
Aleksandr Butâgin — Rusiye arheologı, antikaşınas ve Rusiye Federatsiyasınıñ "Devlet Ermitajı"nıñ Şimaliy Qara deñiz yanındaki qadimiy arheologiya sektorınıñ müdiri. 1999 senesinden başlap o, Qırımdaki Mirmek arheologik ekspeditsiyasınıñ yolbaşçısı edi. İşğal etilgen topraqlardan Ukrayina medeniy degerlikleriniñ hırsızlanmasında iştirak etken şahıslarnıñ cedveline kirsetildi.
2022 senesi Rusiye arheologı Aleksandr Butâgin işğal etilgen Qırımnıñ Keriç civarındaki qadimiy Mirmek şeerinde qazma yapqanda, Rusiyege çıqarılğan Aleksandr Makedonskiy zamanına ait 30 para hazinesini taptı. Onıñ fiyatı 8,5 million ğrıvnâdan ziyadedir. İşğal etilgen Ukrayinada qanunsız çalışqanı içün oña şübe bildirildi.
Qırım Muhtar Cumhuriyeti prokurorlığı Suspilne Qırımğa bildirdi ki, Butâgin — cinaiy dava açılğan bir qaç arheologlardan biridir: umumen yedi adamğa şübe bildirildi, olarnıñ arasında — Qırımdaki qazmalarda iştirak etken em Rusiye, em de Ukrayina vatandaşları bar. Qırımnıñ Rusiye arheologları tarafından nasıl zapt etilgeni aqqında daa tafsilâtlı malümatnı maqaleden oquñız.
Rusiye arheologı Aleksandr Butâgin ilk qış ayınıñ 4-nde Felemenkten Poloniya üzerinden Balkanlarğa ketkende Poloniya mahsus hızmetleri tarafından tutuldı. Poloniya kütleviy haber vastalarınıñ malümatına köre, o, Poloniya prokurorlığında ifade bermekten vazgeçti. Onı 40 künge apiske aldılar.
İlk qış ayınıñ 23-nde Ukrayina resmiy şekilde Poloniyağa, işğal etilgen Qırımda qanunsız qazma işlerinen oğraşqanında şübelengen ve Varşavada tutulğan Rusiye arheologı Aleksandr Butâginniñ ekstraditsiyası aqqında muracaat yolladı.
Qara qış ayınıñ 12-nde Varşava mahkemesi Rusiye arheologı Aleksandr Butâginniñ apis müddetini saban ayınıñ 4-ne qadar uzattı.
Kiçik aynıñ 10-nda Varşavadaki Apellâtsiya mahkemesi Butâginniñ Poloniyada vaqtınca tutuvınıñ qanuniyligini tasdıqladı.
Saban ayınıñ 18-nde Varşava bölgesi mahkemesi, işğal etilgen Qırımda qanunsız qazma işlerinde şübelengen Rusiye arheologı Aleksandr Butâginniñ ekstraditsiyası aqqında Ukratina talabını qanaatlendirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
