Ukraina Tış işler nazirligi, işğal etilgen Qırımdan medeniy degerliklerniñ çıqarılmasında şübelengen Rusiye arheologı Aleksandr Butâginniñ Poloniya apishanesinden azat etilmesini izaatladı. Nazirlik bildirdi ki, onı Ukrayinağa teslim etmemek qararı Rusiye tarafından yarımada işğali içün qullanıla bile. Aynı zamanda Kıyiv, şübheliniñ mesüliyetke çekilmesi içün çalışmağa devam etecegini bildirdi.
Tış işler nazirliginiñ spikeri Ğeorgiy Tıhıynıñ işğal etilgen Qırımdan medeniy qıymetlerni çıqarğanında şübelengen Rusiye arheologı Butâgin ile bağlı izaatı çiçek ayınıñ 28-nde Ukrayina diplomatik hızmetiniñ saytında derc etildi.
"Ukrayina Poloniya mahkemesiniñ evelki adaletli qararına baqmadan, Ukrayina toprağında cinayet işlegeninde — hususan Qırımdan medeniy qıymetlerni çıqarğanında — şübelengen Rusiye vatandaşı Ukrayinağa ekstraditsiya etilmegenini bilgenine yazıqsına. Belli ki, Rusiye tarafı bu siyasiy-uquqiy epizodnı Qırım işğali ve vaqtınca işğal etilgen ukrayin toprağınıñ Rusiye vatandaşları tarafından qullanılmasını aqlamaq içün tsinik şekilde qullanacaq", — dep haberde qayd etildi.
TİN qoştı ki, ukrayin tarafı Butâginni mesüliyetke çekmek içün çalışmağa devam etecek.
"Ukrayina işğal ve cenk içün çalışqan bütün Rusiye subyektlerini kerçek uquqiy mesüliyetke çekmege devam ete. Butâginniñ bu davası ve buña oşağan diger vaziyetler boyunca Ukrayina uyğun uquqiy mehanizmlerni qullanmağa devam etecek ve ortaqlarnıñ yurisdiktsiyalarında da çalışacaq", — dep Tıhıy qoştı.
Evel Baş prokurornıñ ofisiniñ spikeri Maryana Ğayovska-Kovbasük, Butâginge dair qarar tutulğan şahıslarnı deñiştirüvnen bağlı halqara añlaşmalar çerçivesinde qabul etilgenini Suspilnege bildirdi.
"Ukrayina tarafı Rusiyeniñ vatandaşı Butâginniñ Ukrayinada cinaiy mesüliyetke çekilmesi içün onıñ ekstraditsiyasını talap ete edi. Bundan soñ Butâginge dair qarar, tutulğan şahıslarnı deñiştirüvnen bağlı halqara añlaşmalar çerçivesinde qabul etildi. Baş prokurornıñ Ofisi Ukrayinağa ve onıñ medeniy mirasına qarşı yapılğan cinayetler içün bu şahısnı mesüliyetke çekmek içün bütün milliy ve halqara mehanizmlerni qullanmağa devam etecek", — dep spiker bildirdi.
Butâginniñ Poloniya apishanesinden azat etilmesi aqqında ne bilemiz
Çiçek ayınıñ 28-nde belli olğanı kibi, Poloniya ve Belatus arasında esirlerni deñiştirüv çerçivesinde Rusiye arheologı Aleksandr Butâgin Poloniya apishanesinden azat etildi. Brifing devamında Poloniya TİNniñ reisi Radoslav Sikorskıy bunı bildirdi.
"Deñiştirilgen insanlarımızdan biri — Ukrayinağa teslim etilüv esnasında bulunğan Rusiye tarihçısıdır", — dep Sikorskıy ayttı.
Aleksandr Butâgin kimdir
Aleksandr Butâgin — Rusiye arheologı, antikaşınas ve Rusiye Federatsiyasınıñ "Devlet Ermitajı"nıñ Şimaliy Qara deñiz yanındaki qadimiy arheologiya sektorınıñ müdiri. 1999 senesinden başlap o, Qırımdaki Mirmek arheologik ekspeditsiyasınıñ yolbaşçısı edi. İşğal etilgen topraqlardan Ukrayina medeniy degerlikleriniñ hırsızlanmasında iştirak etken şahıslarnıñ cedveline kirsetildi.
2022 senesi Rusiye arheologı Aleksandr Butâgin işğal etilgen Qırımnıñ Keriç civarındaki qadimiy Mirmek şeerinde qazma yapqanda, Rusiyege çıqarılğan Aleksandr Makedonskiy zamanına ait 30 para hazinesini taptı. Onıñ fiyatı 8,5 million ğrıvnâdan ziyadedir. İşğal etilgen Ukrayinada qanunsız çalışqanı içün oña şübe bildirildi.
Qırım Muhtar Cumhuriyeti prokurorlığı Suspilne Qırımğa bildirdi ki, Butâgin — cinaiy dava açılğan bir qaç arheologlardan biridir: umumen yedi adamğa şübe bildirildi, olarnıñ arasında — Qırımdaki qazmalarda iştirak etken em Rusiye, em de Ukrayina vatandaşları bar. Qırımnıñ Rusiye arheologları tarafından nasıl zapt etilgeni aqqında daa tafsilâtlı malümatnı maqaleden oquñız.
Rusiye arheologı Aleksandr Butâgin ilk qış ayınıñ 4-nde Felemenkten Poloniya üzerinden Balkanlarğa ketkende Poloniya mahsus hızmetleri tarafından tutuldı. Poloniya kütleviy haber vastalarınıñ malümatına köre, o, Poloniya prokurorlığında ifade bermekten vazgeçti. Onı 40 künge apiske aldılar.
İlk qış ayınıñ 23-nde Ukrayina resmiy şekilde Poloniyağa, işğal etilgen Qırımda qanunsız qazma işlerinen oğraşqanında şübelengen ve Varşavada tutulğan Rusiye arheologı Aleksandr Butâginniñ ekstraditsiyası aqqında muracaat yolladı.
Qara qış ayınıñ 12-nde Varşava mahkemesi Rusiye arheologı Aleksandr Butâginniñ apis müddetini saban ayınıñ 4-ne qadar uzattı.
Kiçik aynıñ 10-nda Varşavadaki Apellâtsiya mahkemesi Butâginniñ Poloniyada vaqtınca tutuvınıñ qanuniyligini tasdıqladı.
Saban ayınıñ 18-nde Varşava bölgesi mahkemesi, işğal etilgen Qırımda qanunsız qazma işlerinde şübelengen Rusiye arheologı Aleksandr Butâginniñ ekstraditsiyası aqqında Ukratina talabını qanaatlendirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñuz
