Rusiye Federatsiyasında qanunsız şekilde 20 yılğa mahküm etilgen Noman Çelebicihan adına 48-inci ayrı ücüm batalyonınıñ ukrayinalı arbiy hızmetçisi Seyran Asanov Rusiyeniñ "terrorist ve aşırıcılar" cedveline kirsetildi.
Qırımtatar Resurs Merkezi bunı bildirdi.
QRMniñ malümatına köre, Seyran Asanovğa nisbeten qarar 2026 senesi çiçek ayınıñ 22-nde qabul etildi.
Hatırlatamız ki, 2026 senesi çiçek ayınıñ 2-nde Rostov-na-Donudaki Cenübiy bölgeniñ arbiy mahkemesi Noman Çelebicihan adına 48-inci ayrı ücüm batalyonınıñ arbiy hızmetçisine üküm çıqardı. O, sert rejimli müstemlekede 20 yılğa üküm etildi, birinci beş yılını apishanede yatacaq.
Qırımtatar resurs merkeziniñ malümatına köre, Asanov ve batalyonnıñ başqa tutulğan azaları, "terroristik faaliyet"te degil de, Ukrayinanı qorçalamaq içün küreşte iştirak etkeni içün, III Jeneva şartnamesine köre, cenk esirleri olalar.
Bundan evel işğalciler Asanovnıñ esirlikte sorğuğa çekilgen videolarını derc ettiler, bu da esirlerniñ aqlarınıñ bozulğanını tasdıqlay. Bu dava Rusiye tarafından halqara gumanitar uquqnıñ qaidelerini ve III Jeneva şartnamesiniñ qaidelerini muntazam sürette körmemezlikke urğanını köstere, dep QRM qayd etti.
Hatırlatamız ki, Rusiyede 2022 senesi ilk yaz ayınıñ 1-nden itibaren Noman Çelebicihan batalyonı "terror teşkilâtı" olaraq tanıla.
Noman Çelebicihan adına 48-inci ayrı ücüm batalyonı — Ukrayina Silâlı quvetleriniñ Topraq ordusınıñ bölügi, esasen Ukrayina cenübiniñ sakinlerinden teşkil etildi, onıñ qurulışı 2016 senesiniñ başında işğal etilgen Qırımnen memuriy sıñırdaki qamaçav vaqtında başlandı, Noman Çelebicihan — qırımtatar siyasetçisi ve cemaat erbabı şerefine adlandırıldı.
Qırımtatar resurs merkeziniñ idarecisi Zarema Bariyeva Facebook saifesinde qanunsız üküm 2026 senesi çiçek ayınıñ 2-nde ilân etilgenini qayd etti. Onıñ aytqanına köre, işğalciler 17 ay devamında arbiy hızmetçige qarşı dava uydurğan ediler. Seyrannıñ sabıq ömür arqadaşı Nadiya bu sene saban ayınıñ 11-nde Rusiye adliyecisinen soñki sefer laf etken edi. O, mahkeme tezden "qarar çıqarır", dep tenbiyeledi.
Aynı zamanda belli olğanı kibi, Seyran Asanov batalyonğa 2024 senesi arman ayınıñ 26-da alındı, 2024 senesi orta küz ayınıñ 18-de ise Donetsk vilâyetiniñ Volnovaha rayonınıñ Zolota Nıva mesken yeri rayonında esirlikke tüşti.
Alınğan soñ, onı Herson vilâyetiniñ işğal etilgen Çonğar şeerindeki 2-nci SİZOda tuta ediler, soñra Donetskke avuştırıldı, soñra ise Rostov-na-Donuğa avuştırıldı. Arbiy esir statusı Halqara Qızıl Haç Eyyetiniñ Merkeziy taqiqat agentligi tarafından tasdıqlandı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
