Rusiye, Noman Çelebicihan adına 48-nci ayrı ücüm batalyonınıñ ukrayin askeri Seyran Asanovğa qanunsız apis cezasını berdi. O, müstemlekede 20 yılğa mahküm etildi, ilk 5 yılını apishanede keçirecek. 2024 senesi orta küz ayınıñ 18-nde Donetsk vilâyetiniñ Volnovaha rayonınıñ Zolota Nıva mesken yeri civarında Rusiye esiri oldı.
Rusiye Federatsiyasınıñ Cenübiy bölgeniñ arbiy mahkemesiniñ matbuat hızmetiniñ Telegram haberinde esirge qarşı qanunsız üküm aqqında haber etildi.
"Rusiye Federatsiyasınıñ Ceza qanunnamesiniñ 275-inci maddesdevlet hainligiiniñ 2-nci qısmı 205.5 maddesiniñ 2-nci qısmı terroristik teşkilâtnıñ faaliyetinde iştirak etüvve 205.3 maddesiniñ 3-ünci qısmıterroristik faaliyet maqsadınen talim aluvna köre cinayet işlegeninde qabaatlanğan Asanov Seyran Arkadiyovıçqa qarşı cinaiy dava boyunca üküm çıqarıldı. Qayd etilgenine köre, mabüs duşman tarafına keçip, Noman Çelebicihan adına qırımtatar göñülli batalyonınıñ (48-inci ayrı ücüm batalyonı — muar.) erkânında iştirak etmek maqsadınen Ukrayina Silâlı quvetlerine qoşuldı", — dep haberde qayd etildi.
Ruslar Seyran Asanovnı "devlet hainligi", "terroristik faaliyet maqsadınen talim aluv", "terroristik teşkilâtnıñ faaliyetinde iştirak etüv" maddelerine istinaden qanunsız sürette mahküm ettiler.
Qırımtatar resurs merkeziniñ malümatına köre, Asanov ve tutulğan batalyon azaları üçünci Jeneva şartnamesine köre cenk esirleri sayıla, çünki olar "terroristik faaliyeti"nde degil de, Ukrayinanı qorçalamaq içün küreşte iştirak ettiler.
Bundan evel işğalciler Asanovnıñ esirlikte sorğuğa çekilgen videolarını derc etti, bu da esirlerniñ aqlarınıñ bozulğanını tasdıqlay. Bu dava Rusiye tarafından halqara gumanitar uquqnıñ qaidelerini ve III Jeneva şartnamesiniñ qaidelerini muntazam sürette körmemezlikke urğanını köstere, dep QRM qayd etti.
Hatırlatamız ki, Rusiyede 2022 senesi ilk yaz ayınıñ 1-den itibaren Noman Çelebicihan batalyonı "terror teşkilâtı" olaraq tanıla.
Noman Çelebicihan adına 48-inci ayrı ücüm batalyonı — Ukrayina Silâlı quvetleriniñ Piyade ordularınıñ bölügi, esasen Ukrayina cenübiniñ sakinlerinden teşkil etildi, onıñ qurulışı 2016 senesiniñ başında işğal etilgen Qırımnen memuriy sıñırdaki qamaçav vaqtında başlandı, Noman Çelebicihan — qırımtatar siyasetçisi ve cemaat erbabı şerefine adlandırıldı.
Qırımtatar resurs merkeziniñ idarecisi Zarema Barieva Facebook saifesinde qanunsız üküm 2026 senesi çeçek ayınıñ 2-nde ilân etilgenini qayd etti. Onıñ aytqanına köre, işğalciler 17 ay devamında arbiy hızmetçilerge qarşı dava uydurğanlar. Seyrannıñ sabıq ömür arqadaşı Nadiya bu sene saban ayınıñ 11-nde Rusiye adliyecisi ile soñki sefer laf etken edi, o, mahkeme "qarar çıqarır", dep tenbiledi.
Uquq qorçalayıcılarnıñ aytqanına köre, ruslar Noman Çelebicihan batalyonınıñ iştirakçilerine qarşı uydurılğan davalarda resmiy "delil" qullanalar — içtimaiy ağlardaki yazılar, fotoresimler ya da "gizli şaatlar"nıñ ifadeleri.
"2014 senesinden başlap, QRM Noman Çelebicihan adına batalyonda iştirak etkeninde qabaatlanıp eñ az 74 tutulğanını qayd etti: 21 — işğal etilgen Qırımda, 51 — işğal etilgen Herson vilâyetinde 2022 senesi kiçik aynıñ 24-nden soñ, em de 1 — Volın vilâyetinden ve 1 — Hmelnıtsk vilâyetinden. Ümüt etem ki, bu dava boyunca mahküm etilgenlerniñ episi tezden deñişim cedveline kirsetilecek ve Ukrayinağa qayta bilecekler. Seryannıñ beş yaşında küçük qızı Dianoçka onı beklegenini bilem", — dep Barieva ayttı.
Hatırlatamız, Rusiye Federatsiyasınıñ Cenübiy bölgeniñ arbiy mahkemesi Rusiye esirliginde bulunğan daa bir ukrayin arbiy hızmetçisi — Serğiy Yatskovnı sert rejimli müstemlekede 20 yılğa üküm etti. O, Noman Çelebicihan adına qırımtatar göñülli batalyonınıñ iştirakçisidir. Şimdi onı qanunsız sürette Rusiye Federatsiyasınıñ Ulyanovsk vilâyetindeki Dimitrovgrad apishanesine etap ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
