İşğalciler Noman Çelebicihan adına 48-nci ayrı ücüm batalyonınıñ ukrayinalı esiri olğan Seyran Asanovnı işğal etilgen Donetskten Rostov-na-Donuğa mahkeme içün etap eteler.
Qırımtatar Resurs Merkeziniñ idare reisi ve Qırımtatar Milliy Meclisiniñ azası Eskender Bariiev bunı bildirdi.
"Qanunsız sürette Çonğardan Donetskke etap etilgne Asanov Seyran şimdi Rostov-na-Donuğa mahkeme esnasında yollanıla. Seyran Herson vilâyetiniñ işğal etilgen Çonğar köyündeki 2-nci SİZOda 2024 senesi ilk qış ayınıñ 19-ndan berli tutula edi, yaqın vaqıtta ise Donetskke etap etildi. Arbiy esir statusı Halqara Qızıl Haç Eyyetiniñ Merkeziy taqiqat agentligi tarafından tasdıqlandı", — dep Bariiev bildirdi.
Onıñ aytqanına köre, Seyran davasınıñ ilk oturışı 2025 senesi boş aynıñ 8-ne Rostov-na-Donu şeerindeki Cenübiy bölgeniñ arbiy mahkemesinde keçirilecek edi. Lâkin işğalciler Donetskten Rostovğa askerni alıp ketmege yetiştirmeyler, bu sebepten oturış başqa künge avuştırıldı.
"43 yaşındaki Seyran terroristik teşkilâtnıñ iştirakçisi olaraq mahküm etile ve Noman Çelebicihan batalyonında iştirak etkeni ve Ukrayinanı qorçalağanı içün terrorizmde qabaatlana. Erkek 20 yılğa qadar apis cezasını ala bile. Asanov Noman Çelebicihan adına 48-nci ayrı ücüm batalyonına 2024 senesi arman ayınıñ 26-da alındı, amma 2024 senesi orta küz ayınıñ 18-de Donetsk vilâyetiniñ Volnovo rayonınıñ Zolota Nıva mesken yerinde esirlikke tüşti", — dep Bariiev qayd etti.
O şunı da qayd etti ki, işğalli akimiyet Asanovnıñ esirlikte sorğuğa çekilgen videolarını derc etti, bu da esirniñ aqları bozulğanınıñ daa bir isbatıdır. Bu dava Rusiye tarafından halqara gumanitar uquqnıñ qaidelerini ve III Jeneva şartnamesiniñ qaidelerini muntazam sürette körmemezlikke urğanını köstere.
"Asanov, qanunsız sürette mahküm etilgen Serğiy Yatskov kibi, deñiştirüv cedvellerinde olmalı ve Rusiye Federatsiyasında qanunsız sürette mahküm etilgen vatandaş olaraq degil de, arbiy esir olaraq baqılmalı. Bu insanlar memleketimizni qorumaq içün küreşti, onıñ içün olarnıñ davaları em ukrayin, em de halqara toplulıqnıñ diqqatını celp etmek, malümat tarqatmaq ve acele azat etmek kerek", — dep Bariiev qayd etti.
Hatırlatamız ki, 2022 senesi ilk yaz ayınıñ 1-nde Rusiye Yuqarı mahkemesi Noman Çelebicihan batalyonını "terror teşkilâtı" olaraq tanıdı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
