Noman Çelebicihan adlı 48-inci ayrı ücüm batalyonınıñ daa bir ukrayin esirini Rusiyede "terrorizm"de qabaatlap mahkeme eteler. Söz, 2024 senesi orta küz ayınıñ 18-nden berli esirlikte bulunğan ve Herson vilâyetiniñ vaqtınca işğal etilgen Çonğar şeerindeki 2-nci SİZOda tutulğan qırımtatar Seyran Asanov aqqında kete.
Qırımtatar resurs merkeziniñ (QRM) reisi, Qırımtatar Milliy Meclisiniñ azası Eskender Bariiev bunı bildirdi.
Asanov batalyonğa 2024 senesi arman ayınıñ 26-nda alındı ve Donetsk vilâyetiniñ Volnovaha rayonınıñ Zolota Nıva köyünde esirlikke tüşti. Rusiye işğalli akimiyeti onı "terrorizm"de qabaatlay ve 20 yılğa üküm etmege planlaştıra.
"Soñki eki afta içinde bu endi ekinci adisedir ki, Ukrayina arbiy esirleri Rusiye Federatsiyasında qanunsız mahkeme etile. Birinci, Çelebicihan batalyonında iştirak etkeni içün 20 yılğa üküm etilgen Serğiy Yatskov edi", — dep qayd etti Bariiev.
Qırımtatar resurs merkeziniñ malümatına köre, Asanov ve tutulğan batalyon azaları III. Jeneva şartnamesine köre cenk esirleri ola.
"Bu insanlarnıñ cenk esirleri olaraq tanılması olarnı azat etüv esnasını qolaylaştıracaq ve siyasiy taqiplerden qorçalaycaq, çünki olar terroristik faaliyette degil de, Ukrayina qorçalavı içün küreşte iştirak etken ediler", — dep Bariiev qayd etti.
Bariiev dedi ki, ukrayin esirlerine qarşı qabaatlavlar kerçek cinayetlerni köstermegen tamamen uydurılğan "deliller"ge esaslana.
Bu davalarda "resmiy" deliller içtimaiy ağlardaki yazılar, fotolar ya da gizli şaatlarnıñ ifadeleri ola. Bu, halqara uquq ve insan aqlarını boza", — dep QRM qoştı.
Şimdilik, QMC malümatına köre, Noman Çelebicihan batalyonında iştirak etkeni içün işğalciler eñ azından 66 insannı tuttı: 19-ı — Qırımda, 47-si — Herson vilâyetinde.
"Bu insanlar memleketimizni qorçalamaq içün küreşti, ve olar terroristler kibi degil de, cenk esiri olaraq sayılmaq kerekler. Olarnıñ davaları Ukrayina ve halqara toplulıqnıñ diqqatını celp etmek, malümat tarqatmaq ve acele azat etilmek kerek", — dep uquq qorçalayıcılar qayd ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
