Alman dizayneri Frank Vilde siyasiy mabüs Boğdan Zizanıñ mentorı oldı

İçtimaiy ağlarda Ukrayinağa faal şekilde qol tutqan alman stilisti ve dizayneri Frank Piter Vilde, işğalciler tarafından terrorizm maddesi boyunca 15 yılğa üküm etilgen Qırım siyasiy mabüsi Boğdan Zizanıñ mentorı oldı.

Çeçek ayınıñ 10-nda o, Instagram saifesinde bunı bildirdi.

"Bugün Qırımdan hırsızlanğan ve Rusiye müstemlekesinde tutulğan siyasiy mabüs Boğdan Ziza üzerinde mentorlığını aldım. Boğdan aqqında ilk sefer graffiti ressamı 16 yaşında olğanda içtimaiy ağlar vastasınen eşittim... Mentorlığım onıñ işi unutılmaycağını, onıñ ve Rusiyede qanunsız sürette apiske alınğan 16 biñ diger ukrayin vatandaşları aqqında haberdarlıqnı arttırmağa yardım ete", — dep stilist ayttı.

Frank Piter Vilde, Boğdan Ziza davasını nezaret etkenini Suspilne Qırımğa bildirdi.

"Boğdan bir yıldan berli küneş ışığını körmey. Onıñ sağlığı pek ağır. O, işkencege oğratıla, yañğızlıq ve ruhiy zorbalıqqa oğratıla", — dep Berlin dizayneri qayd etti.

O, Zizanıñ mentorı olmağa ne sebepten qarar alğanını da añlattı. Vilde, "Rusiye esirliginde olğan ve deşetli şaraitte bulunğan" bütün mabüsler aqqında cemaatnıñ diqqatını celp etmege istegenini bildirdi.

"Eger de siz mentor olmağa isteseñiz, bu meseleler aqqında muntazam sürette yazmağa, numayışlarda ve intervyularda aytmağa mecbur olacaqsıñız. Maliyeviy basqı ya da başqa bir şeynen alâqası yoq. Qorqqanıñız tamam bu olsa, Rusiyeniñ yapqanı bu deşetli cenk cinayetleri aqqında aytmaq pek, pek müimdir. Siz Boğdan Ziza kibi insanlarnıñ sesi ola bilesiñiz. Ve men siziñ olarnıñ sesi olmañıznı isteyim, çünki rusiye işğalciler olarnı susturdılar", — dep dizayner qayd etti.

Hatırlatamız ki, advokatlıq mentorlığı teşebbüsi çerçivesinde sabannıñ 18-nde Almaniya Bundestagınıñ sabıq vitse-prezidenti Katrin Gering-Ekardt Qırım siyasiy mabüsi Asan Ahtemovnıñ mentorı oldı.

Umumen alğanda, Kremlniñ Qırım mabüsleri içün mentor olaraq, Frenk Vildenen ğayrı, daa altı çetel siyasetçi ve alim oldı. Suspilne Qırım muarririyeti, işğal etilgen yarımadadan ukrayin siyasiy mabüsleriniñ çetel mentorları aqqında bilgenlerini bildirdi.

2025 senesi saban ayında içtimaiy ağlarında er kün Ukrayina aqqında tarif etken Frank Piter Vilde ukrayin ve qırımtatar timsallerinen ve "Crimea is Ukrainе" ("Qırım — Ukrayinadır") yazısınen yañı urba kiygen fotosüretni derc etti.

Boğdan Ziza aqqında ne bilemiz

2022 senesi mayıs ayınıñ 20. künü qırım ressamı ve faalcisi Boğdan Zizağa qarşı "terror aktını yapmağa ıntıluvı" aqqında cinaiy dava açıldı. Onı şübeleyler ki, mayıs ayınıñ 16. künü işğalli şeer memuriyetiniñ binasını boyanen boyaladı ve onı yaqmağa tırışqan.

Bozarğan aynıñ 6. künü Rostov-na-Donudaki Cenübiy bölge arbiy makemesi qırım ressamı ve faalcisi Boğdan Zizanı 15 senege maküm etti.

Bozarğan aynıñ 10. künü Ziza açlıq ilân etti. O, rusiye vatadaşlığından marum etmesini ve ukrain siyasiy mabüslerini azat etmesini talap etti. Bozarğan aynıñ 27. künü açlıq çekmege bitirdi.

Ukrain repçisi Artem Loik, 15 senege maküm etilgen ressam ve faalcini destek etmek içün video çıqardı, çünki Ziza soñ sözüni aytqanda repçiniñ "Krıla" ("Qanatlar" - terciman) yırından sözlerni qullandı.

Qırımda apis etilgen Kezlevli ressam Boğdan Zizanıñ şerefine ukrain ressamları trenni resimlernen yaraştırdılar.

2023 senesi berim ayınıñ 27. künü Vlasıha şeerindeki Arbiy apellâtsiya makemesi, qırım ressamınıñ 15 senelik ükümini deñiştirmeyip qaldı.

Boş aynıñ 12. künü siyasiy mabüsniñ mektüp dostu ondan mektüp alıp haber berdi ki, Boğdan Ziza Perm şeeriniñ 29. müstemlekesine etap etile. Bundan evel arqabaları, etap devrinde qayda bulunğanını bilmegen ediler.

Читати ще