Ukrayina tasil nazirligi (UTN), Ukrayina tasil inkişafı institutı ve Ukrayina Küçük ilimler akademiyasınen beraberlikte, cebege yaqın ve vaqtınca işğal etilgen topraqlarda (VİET) oturğan ve hadimler yedeginde bulunğan pedagoglar içün kompleks onlayn-kursnı başlatalar.
Çeçek ayınıñ 8-nde UTN öz Facebook saifesinde bu aqqında haber etti.
O qayd etti ki, "Temel: işğalden azat etilgen topraqta tasilniñ ğayrıdan tiklenüvi" kursı programması, ocalarnıñ işsizligi vaqtında tasil almasına ve işğalden azat etilecek soñ işke azırlanmasına yardım etmek içün azırlanıla.
Nazirlikniñ qayd etkenine köre, kurs — bu birinci basamaqtır. Bundan soñ iştirakçiler qurulışlı gruppa oturışları, ameliy moduller ve mentorlıq aletlerine ögrenecekler.
Kursnıñ yerleştirilgen "Onlayn umumukrayin mektebi" platformasında onıñ esas tematik blokları qayd etildi, şu cümleden:
- Malümat telükesizligi — teşviqat, tenqidiy tüşünce ve infohigiyenadan qorçalav;
- Ruhiy destek — bala travmalarınen çalışuv, yanğınnıñ ögüni aluv;
- Tasilniñ mündericesi — Yañı ukraiyn mektebiniñ buhran şaraitine uyğunlaşması, inklüziya, tasil ğayıplarını yeñüv;
- Raqamlı aletler — sıñırlı resurslarnen uzaqtan tasil teşkil etüv;
- Reintegratsiya ve ğayrıdan tiklev — işğalden azat etilgen topraqlarda tasil müessiseleriniñ iş hususiyetleri;
- Mediatsiya ve kommunikatsiya — zorbalıqsız qonuşuv, ğayrıdan tiklev ameliyatları;
- İnklüziya ve vatandaşlıq tasil — telükesiz, inklüziv müitniñ yaratılması ve cemiyetniñ ğayrıdan qurulması şaraitinde vatandaşlıq qabiliyetleriniñ şekillendirilmesi.
O şunı da añlattı ki, leyhanıñ maqsadı — pedagoglarnıñ tasil sistemasına celp etilmesini saqlamaq, olarnıñ ihtisasiy qabiliyetini ve ruhiy dayanıqlığını desteklemek, em de olarnı belli olmağan şaraitlerde çalışmağa ve işğalden azat etilgen topraqlarda tasil esnasını ğayrıdan tiklemege azırlamaq.
Hatırlatamız ki, 2025 senesi mayıs ayında işğal etilgen Qırım sakinleri içün ukrayin tasilini almaq imkânını bergen yañı tasil-malümat platforması çalışıp başladı.
Ukrayina, yañı baqışlar kerek olğan işğalden azat etilgen topraqlarda çalışacaq kadrlarnı azırlay. Bu maqsatnen eki magistratura programması açıldı: "Çatışmadan soñki idare etüv" ve "Cenkte olğan topraqlarnı idare etüv".
Ukrayina prezidentiniñ Qırım MCdeki temsilciligi, Ukrayina devlet hızmeti meseleleri milliy agentligi ve tasil alğanlar VİET içün kadrlar yedegi nasıl olacaq ve kimge eñ çoq kerek olacağını añlattılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
