Rusiye kontrolindeki Simferopolbıñ (Aqmescitniñ) Kıyiv rayon mahkemesi Qırım siyasiy mabüsi Amethan Abdulvapovnıñ, apis cezasını çekken soñ, İrkutsk vilâyetindeki müstemlekege avuştırılmasını qanunsız olaraq tanılmasını talap etken davasını red etti.
Qırım birdemligine uquqçı Nazim Şeyhmambetov bunı bildirdi.
Onıñ aytqanına köre, Abdulvapov davanı Angarsktaki müstemlekeñ Qırımdan 5,5 biñ kilometr uzaqlığında yerleşkeninen esasladı, bu ise onı qorantasınen bağ tutmaq imkânından marum ete.
"Bu, onıñ ve yaqınlarınıñ qısqa müddetli ve uzun müddetli körüşüv aqqını amelge keçirmege imkân bermey", — dep Şeyhmambetov bildirdi.
Advokatnıñ qayd etkenine köre, siyasiy mabüsniñ ana-babası pensiyağa çıqa ve yaşı, sağlığı ve maddiy qıyınlıqları sebebinden onı ziyaret etip olamaylar. Abdulvapovnıñ apayı, çağına yetmegen balalarnı östürgen qadın, bu mesafeni de keçip olamay.
"Bu, Abdulvapnıñ halqara, milliy qanunlar ve RF Ceza-içtimaiy qanunnamesi tarafından kefil etilgen aile bağlarını saqlamaq aqqınıñ bozuluvıdır", — dep advokat qayd etti.
Amethan Abdulvapov özü video konferentsiya formatında bile oturışta iştirak etip olamadı. Mahkeme bunı tehnikiy imkânsızlıqnen añlattı. Amma imayeci taraf, bu onıñ imayesi altında bulunğan şahısnıñ aqlarınıñ bozuluvı ola, dep saya.
"Onıñ, memuriy mahkeme esnasında kefil etilgen ve amelge keçirilmegen delillerni taqdim etmek, red etmek ya da red etmek aqqı bar", — dep Şeyhmambetov tarif etti.
Mahkeme, siyasiy mabüsniñ özü olmağan vaqıt uquqçısınıñ delillerini baqıp, şikâyet arizasını red etti. Qararda qayd etilgenine köre, "terror teşkilâtında" iştirak etüv maddesine istinaden mahküm etilgenlerniñ uzaq müessiselerge etap etüvge itiraz bildirmege aqqı yoq.
"O şunı da qayd etti ki, qoranta bağlarını saqlap qalmaq imkânsızlığı, tuvğanları yaşağan ya da olarğa eñ yaqın olğan regionlarda ceza yerine tayin etüv ya da başqa bir müessisege avuştırılmaq içün istisnaviy sebep degildir", — dep advokat yekünledi.
Advokat, qararnıñ tam metnini alğan soñ, onıñ şikâyet etilecegini qoştı.
Hatırlatamız ki, 2025 senesi oraq ayında Abdulvapnı İrkutsk vilâyetiniñ Angarsk şeerindeki 2-nci tüzetüv müstemlekesine avuştırğan ediler. Yaqın vaqıtta o, qorantasına infarkt olğanını bildirdi.
Qorantasınıñ aytqanına köre, diagnoznı apishaneniñ ekimleri qoydı, amma aqaynıñ evelleri yürek hastalığı olmağan edi. Bundan soñ o, soy-soplarından kerekli ilâclarnı yollamağa rica etti, çünki, onıñ aytqanına köre, koloniya ilâcsız qaldı.
Siyasiy mabüsniñ babası Necip Abdulvapov Rusiye Tahqiqat eyyetinr muracaat etip, oğlunıñ tutuv şaraitini ve müstemleke hadimleriniñ vekâletlerini aşqanlarını teşkermege talap etti.
"Onıñ yüregi sağlam edi. O, iç bir vaqıt şikâyet etmedi. Amma o, bu müstlekedr kelgende birden felçke oğradı. Bu tek ağır beden areketleri olğanını köstere bile", — dep siyasiy mabüsniñ babası bildirdi.
Bundan evel Abdulvapov qorantasına tişi, qan basımı ve közyaşlarındaki şişmeler aqqında da haber etken edi. O, kerekli tibbiy yardım aldımı belli degil, çünki etap vaqtında bağ yoq edi.
Bundan da ğayrı, 2025 senesiniñ küzünde siyasiy mabüs ceza izolâtorında tutulğanı belli oldı.
"Hizb ut-Tahrir davası"nıñ dörtünci Aqmescit gruppası aqqında ne bilemiz
2021 senesi arman ayınıñ 17-nde FSB musulman ve qırımtatarlarnıñ evlerini kütleviy şeklde tintti.
Tintüvlerden soñ işğalli quvetçiler beş insannı "terror teşkilâtınıñ faaliyetinde iştirak etüv"de qabaatlap yaqaladılar (Rusiye Ceza qanunnamesiniñ 205.5-nci maddesi). Aqyarnıñ (Sevastopolnıñ) Nahimov rayonında — faalci Rustem Murasov ve Rustem Tairov, Aqyarnıñ Balıqlava rayonında — Cebbar Bekirov, Bağçasaray rayonında — faalci Zavur Abdullayev, Aqmescit (Simferopol) rayonında — Raif Fevziyev.
2023 senesi qara qış ayınıñ 12-nde Rostov-na-Donu Cenübiy bölgeniñ arbiy makemesi Raif Fevziyevni 17 senege maküm etti. Daa soñra Vlasiha şeeriniñ Apellâtsiya arbiy makemesi ükümni deñiştirmedi.
Daa soñra, 2022 senesi kiçik aydan başlap, bu dörtünci Aqmescit gruppasına daa bir iştirakçi — Amethan Abdulvapov qoşuldı. Qırımtatar, sert rejimli müstemlekede 10,5 senege üküm etildi, soñra ise üküm deñiştirilmedi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
