On buçuq yıl apiske mahküm etilgen qırım siyasiy mabüsi Amethan Abdulvapov, Rusiyede İrkutsk vilâyetiniñ tahqiqat tevqifhanesinde tutulmaqta ve anda ceza müstemlekesinde avuştırılmasını bekley. Amma onı tam olaraq qayda yollaycaqları daa belli degil.
Bu aqta o, ömür arqadaşı Lenura Abdulvapovağa "Zonatelekom" vastası ile haber etti, dep haber ete kiraz aynıñ 21-de cemaat teşkilâtı "Qırım birdemligi".
Onıñ aytqanına köre, tahqiqat tevqifhanesi, Qırımdan altı biñ kilometr uzaqlıqta yerleşken.
"O, kiraz aynıñ 6-dan berli alâqada degil, biz raatsızlandıq, amma, şükürler olsun, tek bir qaç satır yazdı, o, tahqiqat tevqifhanesinde buluna eken", — dep qayd etti siyasiy mabüsiniñ apayı.
Bundan evel qırımtatar, tişlerniñ meselelerinden, basım aqqında havflılıqlardan ve köz qapaqlarınıñ şişkeninden şikâyet ete edi. Amma oña kerekli tibbiy yardım berilgenmi, belli degil, çünki aqaynen alâqada olmadı.
Hatırlatamız ki, 2022 senesi uvut aynıñ 9 künü saba Rusiye havfsızlıq küçleri yarımadanıñ bir qaç rayonlarında qırımtatarlarnıñ evlerini tinttiler, bundan soñ dört adam tutuldı. Bu Ansar Osmanov, Marlen Mustafayev, Ernest Seitosmanov ve Ametan Abdulvapov. Aynı şu künü olarnı Simferopoldeki (Aqmescit) tahqiqat tevqifhanesine yolladılar.
Amet Abdulvapov, Rusiye Cinaiy kodeksiniñ 205.5-nci maddesiniñ 2-nci qısmı boyunca "terroristik teşkilâtında iştirak etüvinde" qabaatlanıldı. "Hizb ut-Tahrir" islâm siyasiy fırqasına azalıq aqqında söz kete.
2023 senesi saban aynıñ 15-te Rostov-na-Donu şeeriniñ Cenübiy arbiy rayon mahkemesi, Amethan Abdulvapovnı 10 yıl 6 ayğa mahküm etti.
Evelden Qırımtatar resurs merkezi, Rusiye işğal etilgen Qırımdan eñ azdan 25 esli-başlı siyasiy mabüsni izolâtorlarda ve koloniyalarda tutqanını bildirgen edi. Olarnıñ çoqusı, qanunsız yolnen uzun müddetke – 5 yıldan 18 yılğace mahküm etildi.
Hizb ut-Tahrir – islam siyasiy fırqası. 2003 senesi Rusiyede onı terroristik teşkiyatı kibi tanıdılar, oña ait olğanlarını ise taqip etmege başladılar. İştirakçılarnı "qabarcılıqqa qarşı faaliyetinde" ve "dünyaara hilâfet" degenini teşkil etmege ıntıluvında qabaatlaylar. 2014 senesi Qırımnıñ işğalinden soñ işğalciler zapt etilgen Qırımğa öz qanunnamesiniñ areketini tarqattılar. Böyleliknen, yarımadanıñ işğalinen razı olmaması içün qırımtatarlarına basqısını quvetleştirip, Hizb ut-Tahrir-ge alâqasında qırım musulmanlarnı da qabaatlamağa başladılar.
Telegram, WhatsApp, Facebook ve YouTube-ta Suspilne Qırım haberlerine abune oluñız
