10,5 yılğa qanunsız şekilde mahküm etilgen siyasiy mabüs Amethan Abdulvapov Angarsktaki (İrkutsk vilâyeti) 2-nci sert rejimli müstemlekeniñ ŞİZOda (ceza izolâtorında) tutula.
Siyasiy mabüsniñ babası Necip Abdulvapov "Qırım birdemligi"ne bu aqqında tarif etti.
"Necip Abdulvapov Tahqiqat eyyetine İrkutsk vilâyetiniñ Angarsk şeerindeki 2-nci sert rejimli müstemlekeni teşkermege talap etici ariza berdi", — dep haberde qayd etildi.
Hatırlatamız ki, oraq ayında qırımtatar siyasiy mabüsi Amethan Abdulvapovnıñ babası Rusiye Tahqiqat eyyetine muracaat etip, oğlunıñ Angarsk şeeriniñ 2-nci müstemlekesinde köteklengenini tahqiq etmege talap etti. Bunı Abdulvapovnıñ babası "Qırım birdemligi"ne bildirdi.
Bundan ğayrı, 2022 senesi kiçik aynıñ 9-nda saba Rusiye quvetçileri yarımadanıñ bir qaç rayonında qırımtatarlarnıñ evlerini tintip, dört insannı tuttılar. Bular Ansar Osmanov, Marlen Mustafayev, Ernest Seytosmanov ve Amethan Abdulvapov ediler. Aynı künü olarnı Simferopoldaki (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adteki) SİZOğa yolladılar.
Amethan Abdulvapov Rusiye Ceza qanunnamesiniñ 205.5 maddesiniñ 2-nci qısmına istinaden "terror teşkilâtında iştirak etüv"de qabaatlandı. "Hizb ut-Tahrir" islâm siyasiy firqasınıñ azası olğanından söz yürsetile.
2023 senesi saban ayınıñ 15-nde Rostov-na-Donu Cenübiy bölgeniñ arbiy mahkemesi Amethan Abdulvapovnı 10 yıl ve 6 ayğa mahküm etti.
Daa evel Qırımtatar resurs merkezi bildirdi ki, Rusiye tahqiqat izolâtorları ve müstemlekelerde işğal etilgen Qırımdan eñ az 25 yaşlı siyasiy mabüsni tuta. Çoqusı qanunsız sürette 5 yıldan 18 yılğa qadar apis cezasını aldı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
