Ukrayina mudafaa quvetleri soñki vaqıtları vaqtınca işğal etilgen Qırımdaki Rusiye arbiy obyektlerine ücümlerini quvetleştirdi. İşğalcilerniñ AMS sistemasınıñ, radiolokatsiya stantsiyaları, dronlar ve diger tehnikanıñ bozulması aqqında söz yürsetile. Bundan evel böyle usullar qullanılğanına baqmadan, ücümler daa da muntazam oldı.
UHHniñ sabıq hadimi ve arbiy mütehassıs İvan Stupak Suspilne Qırımğa bu aqqında tarif etti.
"Miqyası kerçekten de şaşılacaq. Evelleri bu tek-tek noqta ücümleri edi, bizler quvandıq, şimdi ise olar kerçekten de sistematik oldılar ve bizler üç qat quvandıq. Çünki bizim komandanlığımıznıñ doğrudan-doğru insansız sistemaları işğal etilgen topraqlardaki maqsatlarğa ücüm etüv esnasını konveyerge qoydı, yani, bir kün de olsa, maqsatlarğa ücüm etilmey", — dep Stupak tarif etti.
Onıñ aytqanına köre, ukrayin arbiy hızmetçileri ne qadar çoq çeşit ve paalı obyektlerge ücüm etse, Rusiyege öz qabiliyetini ğayrıdan tiklemek o qadar qıyın olur.
"Şübesiz ki, rusiyelilerniñ Sovetler Birligi zamanından berli AMS, radioelektronik küreş sistemalarını yapa bilecek zavodları bar. Biz olarnı yoq ettik, olar anda altı ay içinde ğayrıdan tiklediler, yañılarını qoydılar. Amma eger olar Moskva kolbasası kibi pek tez kesilse, kolbasası tez biter ve tez azırlamaq imkânı olmaz", — dep mütehassıs tüşüne.
Stupak şunı da qayd etti ki, böyle ücümlerniñ doğrulığı ukrayin istihbaratınıñ semereli çalışqanını ve yarımadada malümat menbalarınıñ bulunğanını köstere.
"Böyle er bir ücüm, Ukrayinanıñ bu topraqta közleri ve qulaqları bar olğanını köstere. Çünki bu tekerlekli kompleksniñ bir ev olmağanını bilemiz. Şimdi o bir yerde ola bile, yarım saatten soñ ise 20 kilometr uzaqta ola bile", — dep o ayttı.
Bundan da ğayrı, mütehassısnıñ aytqanına köre, Rusiyeniñ AMS ve REB sistemalarınıñ yoq etilmesi daa müim maqsadlarğa qarşı nevbetteki ücümler içün imkânlarnı aça.
"Radioelektronik küreşiniñ, AMS sistemalarınıñ yoq etilmesinen bağlı bu sırağa kirgen er bir ücüm, bizge, uçucısız uçaq aletlerimiz ya da raketalarımız şimdi irişip olamağan daa büyük maqsatlarğa yol açmağa imkân bere", — dep Stupak qoştı.
Hatırlatamız ki, İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) Ukrayina Silâlı quvetleriniñ mahsus operatsiyalar quvetleri S-300 ve S-400 Rusiye zenit-raketa kompleksleriniñ "közleri" olğan 64N6E radiolokatsiya stantsiyasını ve onıñ antenasını yoq etti.
USQniñ İnsansız sistemalar quvetleriniñ komandanı Robert ("Madâr") Brovdi bildirdi ki, saban ayınıñ 10-nda işğal etilgen Qırımdaki "Azovska" neft bazasında "Ptahı Madâra" 414-nci ayrı brigadası avtosaqalarğa ve Canköy neft bazasına ücüm etti.
Patlavlar Sevastopolda (Aqyarda), Belbek ve Qaçı ava limanları olğan Şimaliy tarafında da eşitildi. Daa soñra, tahminen saat 05:15-te İnkermanıñ Yeşil dağ civarında ya da General Jidilov soqağında "quvetli patlavlar" oldı, "Pantsir-S1" ZRGK-niñ yeri qayd etile, dep "Qırım yeli" haber etti.
RF Mudafaa nazirligi Rusiyede ve Qırımda, em de Qara ve Azaq deñizleri üzerinde 185 dron urulğanını bildirdi. Amma nazirlik er bir topraq üzerinde tüşürilgen dronlarnıñ sayısını aytmadı.
Daa evel USQniñ StratKomınıñ bildirgenine köre, saban ayınıñ 9-nda gece işğal etilgen Qırımda USQniñ Mudafaa quvetleri AMSnıñ S-300 radiolokatsiya stantsiyasına ücüm etti.
Bundan ğayrı, saban ayınıñ 8-de gece işğal etilgen Qırımda Ukrayina Silâlı quvetleriniñ İnsansız sistemalar quvetleriniñ "Ptahı Madâra" 414-nci ayrı brigadasınıñ "Kayros" 9-ncı batalyonınıñ uçucıları "Nadgrobok" (64N6) yañı radiolokatsiya stantsiyasını (RLS) yoq ettiler.
Bundan evel işğal etilgen Qırımda USQniñ Mahsus operatsiyalar quvetleri dört RLSnı urğanını bildirdi. Hususan, ukrayin arbiy hızmetçileri 5N84A "Oborona-14" RLS, "Nebo-U" RLS ve Yevpatoriyadaki (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addeki) radio şiffaf qubbesindeki eki RLSnı yoq ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
