Saban ayınıñ 8-de gece işğal etilgen Qırımda Ukrayina Silâlı quvetleriniñ İnsansız sistemalar quvetleriniñ "Ptahı Madâra" 414-nci ayrı brigadasınıñ "Kayros" 9-ncı batalyonınıñ uçucıları "Nadgrobok" (64N6) yañı radiolokatsiya stantsiyasını (RLS) yoq ettiler.
Saban ayınıñ 9-nda USQniñ İSQniñ komandanı Robert ("Madâr") Brovdi Facebookta bunı bildirdi.
Onıñ aytqanına köre, bu yüksek areketli üç koordinatlı dairesi boyunca baqqan RLS — "VİE Qırımdaki S-300PM ve S-400 ZRK içün közler" ola.
"Maqsatlar Ukrayinada yapılğan FP-2 middle strike vastalarınen 60-100 kg arbiy qısmınen ücüm etildi", — dep İSQniñ komandanı qoştı.
Bundan evel işğal etilgen Qırımda USQniñ Mahsus operatsiyalar quvetleri dört RLSnı urğanını bildirdi. Hususan, ukrayin arbiy hızmetçileri 5N84A "Oborona-14" RLS, "Nebo-U" RLS ve Yevpatoriyadaki (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addeki) radio şiffaf qubbesindeki eki RLSnı yoq ettiler.
Hatırlatamız ki, Ukrayina Silâlı quvetleriniñ Arbiy-deñiz quvetleriniñ bölükleri mahsus operatsiyalar quvetlerinen işbirlikte bulunıp, işğal etilgen Qırımdaki üç "Pantsir-S1" Rusiye zenit raketa-top kompleksini, 02510 leyhalı "BK-16" tez desant katerini urdı ve "Orion" ücüm-istihbarat dronlarınıñ dört idare stantsiyasını bütünley yoq etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
