Ukrayina Silâlı quvetleriniñ mahsus operatsiyaları işğal etilgen Qırımda dört radiolokatsiya stantsiyasını (RLS) urdı.
Saban ayınıñ 9-nda MOQ Facebook saifesinde bu aqqında haber etti.
Hususan, ukrayin arbiy hızmetçileri 5N84A "Oborona-14" RLS, "Nebo-U" RLS ve Yevpatoriyadaki (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addeki) radio şeffaf qubbesindeki eki RLSnı yoq ettiler.
"RLSnıñ radio şeffaf qubbesi, antennanıñ yönelişini gizlep, er angi yönelişte aylanmasına imkân bere. "Duşman RLSnıñ yoq etilmesi, duşmannıñ ava maqsadlarını tapmaq ve yoq etmek qabiliyetini pek zayıflata", — dep haberde qayd etildi.
Hatırlatamız ki, Ukrayina Silâlı quvetleriniñ Arbiy-deñiz quvetleriniñ bölükleri mahsus operatsiyalar quvetlerinen işbirlikte bulunıp, işğal etilgen Qırımdaki üç "Pantsir-S1" Rusiye zenit raketa-top kompleksini, 02510 leyhalı "BK-16" tez desant katerini urdı ve "Orion" ücüm-istihbarat dronlarınıñ dört idare stantsiyasını bütünley yoq etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
