İşğal etilgen Qırımda Mustafa Cemilev ve Refat Çubrovğa qarşı davalarnı sahteleştirgen taqiqatçığa Rusiyede qabarcılıqta şübe bildirip, tevqif ettiler. Şimdi o, SİZOda buluna.
Advokat Mıkola Polozov Facebookta bu aqqında haber berdi.
Polozovnıñ malümatına köre, söz RF Taqiqat eyetiniñ işğal etilgen Qırımdaki Baş taqiqat idaresiniñ ayrıca ağır davalarnıñ taqiqat idaresiniñ üyken taqiqatçısı Mağomed Mağomedov aqqında yürsetile.
Moskvadaki Basman rayon mahkemesi qarar aldı. Mağomed tevqif etilgende taqiqat idaresinde çalışmay edi ve advokat statusı bar edi.
"Mağomed Mağomedov Rusiyede yasaq etilgen ''Qırımtatar Milliy Meclisi'' teşkilâtınıñ liderleri Mustafa Cemilev ve Refat Çubarovğa qarşı cinaiy davalar sebebinden belli oldı — ekisi RFda mahküm etildi. Ukrayinada da Rusiye Taqiqat eyyetiniñ sabıq taqiqatçısı Mağomedovğa qarşı cinaiy dava açıldı. O, cenk qanunları ve qaidelerini bozğanında qabaatlaylar — Ukrayina CQniñ 438-nci maddesiniñ 1-nci qısmı. Çubarov Mağomedovnıñ ''vaqtınca işğal etilgen Qırımdaki eñ qızğın rus cezalandırıcılarından biri'' olğanını ayttı'', — dep Polozov yazdı.
RF taqiqatınıñ malümatına köre, qabarcılıqtan ğayrı, oña qarşı davalardan birinde o, alınğan paranı hırsızlağanında qabaatlana.
Refat Çubarov ve Mustafa Cemilev malümatnı izaatlamadılar.
Hatırlatamız ki, Qırımnıñ işğalli rusiye akimiyeti Qırımtatar Milliy Meclisiniñ reisi Refat Çubarovnı (2014 senesi kiçik aynıñ 26-nda) ''kütleviy mitingler''ni teşkil etkeninde ve RFnıñ topraq bütünligini bozmağa çağırğanında ğıyabiy şekilde qabaatladı.
Qırımda işğalciler Mustafa Cemilevge qarşı bir qaç cinaiy dava açtılar. Şu cümleden, onı ''sıñırnı qanunsız keçirgeni'', ''silâ saqlağanı''nda qabaatlaylar ve 2014 senesi yarımadağa kirmege yasaq ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
