Uquq qorçalayıcı ve vatandaş jurnalisti İrına Danılovıç siyasiy mabüslerniñ taqdiri aqqında meselelerni daa sıq aydınlatmağa çağırdı. Bundan da ğayrı, o, barışıq planınıñ diger maddelerinden vatandaşlarnı azat etüv maddesini "çıqarmaq" kerek olğanını tüşüne.
"Tribunal. Qırım epizodı", siyasiy mabüsnen bağ tutqan tuvğanlarına atıf etip, bu aqqında haber berdi.
"Dünya ukrayin balalarınıñ qaytarılması içün neler yapa bilecegini kösterdi. Amma şimdi buña toqtatmaq vaqtı degil. Rusiye apishanelerine ketirilgen ukrayin qadınları ve esli-başlı insanlarını qaytarmaq içün ne yapa bilecegini köstermege vaqıt keldi", — dep İrına Danılovıçnıñ sözlerini "Tribunal. Qırım epizodı" bildirdi.
Bundan da ğayrı, İrına Danılovıç oña qol tutqan ve Rusiye esirliginden azat etilmesini talap etken bütün insanlar ve teşkilâtlarğa minnetdarlığını bildirdi.
"Men devamlı bir baş ağrısınen yaşayım. Qulaqlarımda gürülti, sızğırav ve çıñlavuq bar. Bularnıñ episi, maña kelgen mektüplerge cevap bermek içün diqqatımnı celp etmege imkân bermey. Amma er bir sıcaq sözüñizni ve farqlı memleketlerden kelgen onlarca yabancınıñ qol tutuvını pek qıymetlendirem", — dep uquq qorçalayıcı qayd etti.
Hatırlatamız ki, 2025 senesi boş ayda İrına Danılovıç, People in Need Çehiya teşkilâtı tarafından berilgen "Qanunsızlıq ikâyeleri" (Stories of Injustice Award 2025) mukâfatını aldı. Şimdi onı Rusiyeniñ Stavropol ülkesinde Zelenokumsk şeerindeki 7-nci qadın müstemlekesinde patlayıcı cihaz saqlağanında qabaatlap tutalar.
Boş aynıñ 4-nde ZMINA insan aqları merkeziniñ idare reisi Tetâna Peçonçik öz Facebook saifesinde bunı bildirdi. O, Danıloviç yerine mukâfatnı aldı ve onıñ adına çıqışta bulundı.
İrına Danılovıç aqqında ne bilemiz
Saban ayınıñ 29-ında vaqtınca işğal etilgen Qırımda işten evge qaytqanda İrına Danılovıç ğayıp oldı. Aynı kün Kefe yanında Oy Quyu köyündeki evi tintildi. Anda ana-babaları yaşağan ediler, evini tintkende işğal quvetçileri cep telefonı ve tehnikasını alıp çıqardılar.
Bir qaç ay devamında tibbiy yardım talap etken soñ saban ayınıñ 21-inde açlıq çekmege ilân etti — izolâtorda, ayrıca keçken sene üküm çıqarılğan soñ onıñ sağlığı pek zayıfladı.
Cinaiy davasınıñ bilgilerinen tanış olıp bitirmek içün qanunsız "Kefe şeer makemesi"ne ketkende Danılovıç bayıldı. Bundan ğayrı, azaplar sebebinden açlıq ilân eter.
Çiçek ayınıñ 6-sında jurnalist açlıq bitirdi, çünki onı teşkermek ve tedaviylemek içün onı Aqamescitteki SİZOdan hastahanege alıp ketirmege söz berdiler.
Bozarğan aynıñ 29-ında işğal etilgen Qırım Yuqarı makemesi içtimaiy jurnalist ve faalci İrına Danılovıçnıñ ükümini deñiştirdi. Bundan evel patlayıcı alet saqlağanı sebebinden yedi senege malüm etildi. Apellâtsiya makemesiniñ qararına köre ceza müddeti bir ayğa azladılar.
Keçken sene boş ayda bildirildi ki, Danılovıç sanitar olmağan şartlarda buluna ve ihtiyac duyğanına baqmadan onı tedaviylemeyler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
