2025 senesi boş ayda işğal etilgen Qırımda eñ az 24 tevqif, 10 yaqalanuv, 5 tintüv ve adaletli mahkeme aqqınıñ bozuluvı aqqında 31 adise qayd etildi, olarnıñ çoqusı qırımtatarlarğa qarşı edi.
Qırımtatar Resurs Merkeziniñ maruzasında bu aqqında aytıla.
Umumen yarımadada boş ayda uquq qorçalayıcılar eñ az 86 insan aqları bozuluvını qayd ettiler.
QRMniñ malümatına köre, maruza müddeti devamında 10 yaqalanuv ya da tutuv qayd etildi, olardan 4-ü qırımtatarlarğa qarşı edi. Bundan ğayrı, 5 tintüv qayd etildi, üçü qırımtatar halqınıñ vekilleriniñ evlerinde oldı.
Eñ çoq tevqif adisesi qayd etildi — boş ayda eñ az 24, olardan 9-ı qırımtatarlarğa qarşı edi. Bundan da ğayrı, uquq qorçalayıcılar 10 sorğu, sorav ve "subet" adiselerini qayd etti, olardan 4-ü qırımtatarlarğa nisbeten keçirildi.
Maruzada adaletli mahkeme aqqınıñ bozuluvı qayd etile. Boş ayda 31 dava qayd etildi, aman-aman yarısı — 15-i — qırımtatarlarğa qarşı edi. Bundan da ğayrı, eñ az 7 kere beden ve maneviy sağlığınıñ eñ yüksek seviyesine aqqınıñ bozuluvı qayd etildi, 4 kere qırımtatarlar zarar kördi.
Bundan ğayrı, boş ayda 4 mabüsniñ etap etilmesi qayd etildi, olardan biri — qırımtatar edi. İşğalli akimiyet Ğennadiy Ösmak, Serğiy Lıhomanov, Seyran Asanov ve Oleksandr Sizikovnı etap etti. Eki siyasiy mabüs — Ayder Saledinov ve Seyran Saliyev — ŞİZO, STŞsert tutuluv şaraiti ya da KTOkamera türlü odada tutuldı.
Maruzada siyasiy mabüsler Fevziye Osmanova, Elviza Aliyeva ve Nasiba Saidovanıñ sıñırlav şaraitine şikâyetleri ve tutulğan qırımtatar qadınlarını hicablarını çet erkeklerniñ yanında çıqarmağa mecbur etüvi aqqında da aytıla. Ayrı qayd etildi ki, siyasiy mabüs Üzeir Abdullayev Salavatnıñ 16-ncı müstemlekesinde "qaçmağa, terrorizm ve aşırıcılıqqa meyilli" olaraq profilaktika cedveline kirsetildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
