Rusiye koloniyasında tutulğan qırımlı siyasiy mabüs ve jurnalist Seyran Saliyev dört aydan ziyade ceza izolâtorında tış dünya ile bağsız keçirdi.
Siyasiy mabüs Seyran Saliyevniñ apayı Mümine Saliyeva Facebookta bu aqqında bildirdi.
"Serân bu sene oraq ayı 10-dan ekim ayı 25-ke qadar ceza izolâtorında tutuldı. İç bir malümat yoq, tışqı dünya ile bağ yoq. Er bir sözümni közleri ile sezip, er şeyni ögrenmege tırıştı. Faaliyetli insan içün böyle tecrit ağır bir yük ola. Amma o bunı becere. Dualar, kitap oquvı, çeşit mevzularda kitapçıqlar yazmaq — onıñ izinine çeşitlik qoşa", — dep qadını tarif etti.
Serân Saliyev 40 yaşında edi. Mümine, soñ körüşüvde, esirlik duyğusını daa ziyade arttırmamaq içün, aqayına evelden hayırlav bildirmegenini ayttı.
"Onıñ yaqın azatlıqqa inanmasını isteyim. Allah içün imkânsız bir şey yoq. İmanımızğa köre, quşlarnıñ sürüleri küçlü fillerni yeñdi", — dep o yazdı.
Basqı ve uzun müddetli izolâtsiyağa baqmadan, Seyran Saliyev küçlü ruhunı saqlap, vicdan mabüslerine qol tuta.
"O, qırımtatar qızlarınıñ qıdıruv ve apiske alınuvı aqqında haberlerden şaştı. Amma qorantaları ve halqına ümütsizlikke qapılmamaları ve ellerini gevşetmemeleri içün haberdar etmege rica etti. Adaletsizlik, yalan kibi, ğayıp olacaqtır", — dep Mümine qayd etti.
Soñ qadın aqayına sağlıq, sabır ve küç tiledi, ve imannıñ olarğa dayanmağa yardım etkenini qayd etti.
"Hizb ut-Tahrir davası"nıñ ekinci Bağçasaray gruppası aqqında ne bilemiz
2017 senesi orta küz ayınıñ 11-nde Rusiye FSB işğal etilgen Bağçasarayda altı qırımtatarnı tuttı: Timur İbragimov, Marlen (Süleyman) Asanov, Memet Belâlov, Seyran Saliyev, Server Zekiryayev ve Ernes Ametov.
Bir seneden soñ, 2018 senesi mayısnıñ 21-nde, işğalciler Edem Smailov ve Server Mustafayevni evlerinde tutıp aldılar.
Olarnı Rusiyede yasaqlanğan, amma Ukraina ve dünyanıñ ülkeleriniñ çoqusında serbest faaliyet köstergen Hizb ut-Tahrir islâm siyasiy firqasınıñ faaliyetinde qabaatlaylar.
Tutulğanlarnıñ episi işğalli Kıyiv rayon mhkemesiniñ qararındn apiske alındı ve tahminen üç sene taqiqat izolâtorında tutuldı.
2022 senesi berim ayınıñ 16-nda Rostov-na-Donudaki Cenübiy bölge arbiy makemesinde bu dava üzerinde üküm çıqarıldı. Onıñ qabaatlıları 13-19 sene apis cezasına maküm etildi.
022 senesi saban ayınıñ 14-nde Vlasiha şeerindeki Apellâtsiya arbiy makemesi imayeciniñ şikâyetlerini aman-aman bütünley red etti ve mabüslerniñ apis müddetlerini aman-aman deñiştirmedi. Seyran Saliyevniñ apis cezası bir senege qısqartıldı - 15 senelik müstemleke cezasına, Ernes Ametovnıñ apis cezası lâğu etildi.
Avropa parlamenti öz rezolütsiyasında Rusiye Federatsiyasını bütün ukrain siyasiy mabüslerini, şu cümleden "Hizb ut-Tahrir davası"nıñ ekinci Bağçasaray gruppasınıñ mabüslerini azat etmege çağırdı.
"Memorial" uquq qorçalayıcı merkezi olarnı siyasiy mabüsler olaraq tanıdı ve Rusiyeni olarnı acelen azat etmege çağırdı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız
