Qırım siyasiy mabüsi, qırımtatar Tofik Abdulgaziyev Rusiye müstemlekesinde ağır hastalıqlar sebebinden, şu cümleden, aqciger tuberkulözi, yürek yetmezligi ve miy şişigi sebebinden kritik alda buluna.
Onıñ apayı Aliye Kurtametova Facebookta bunı bildirdi, dep Qırımtatar Resurs Merkezi (QRM) haber berdi.
Bu hastalıqlarnı bir qısmı tahqiqat izolâtorında (SİZOda) tutulmasq ve cezanı çekmek mümkün olmağan ağır hastalıqlarnıñ resmiy cedveline kirsetilgen. Amma o, apiste qala, dep QRM yazdı.
Abdulgaziyevniñ diagnozları arasında: eki taraflı pnevmoniya, gidrotoraks, anemiya, yürek hastalığı, hronik yürek yetmezligi, gastrit, büyrek taşları, köküs içindeki limfa tüyümleri zarar körip, aqciger tüberkülozi.
Bundan da ğayrı, kelecek afta onkologlar ve nevrologlarnıñ bir subeti keçirilecek, bundan soñ siyasiy mabüsniñ beynindeki şişik aqqında daa çoq malümat berilmesi beklenile.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
