"Hizb ut-Tahrir davası"nıñ Aluşta gruppasınıñ 18 yıl apis cezasına mahküm etilgen, daa evel mahkeme tarafından kanser hastalığı sebebinden azat etilgen ağır hasta Qırım imamı Lenur Halilovnı Rusiye uquq qorçalayıcı organlarınıñ hadimleri evinden kene alıp ketti.
"Qırım birdemligi"ne Onıñ apayı Umida Hudoyberdiyeva bunı bildirdi.
Orta küz ayınıñ ortasında Arhangel vilâyet mahkemesi prokurornıñ muracaatını qanaatlendirip, Halilovnı apishanege qaytarmağa qarar berdi. Bundan evel musulman apellâtsiya mahkemesiniñ qararını beklep, evinde buluna edi — onı tek apishanede tutmaq mümkün edi.
Hudoyberdiyevanıñ aytqanına köre, saba evine vatandaş urba kiygen dört adam keldi.
"Olar Lenur ağa yol ögünde yuvunmasını, kiyimlerini deñiştirmesini beklediler. O hasta, ne içün onı evden alıp ketesiñiz?" — dep siyasiy mabüsniñ apayı tarif etti.
Onıñ qayd etkenine köre, quvetçiler iç bir vesiqa qaldırmadı, tek mahkeme qararını kösterdiler ve aqayğa "tanış olmağa" teklif ettiler. Onı qayda alıp ketkenleri belli degil — uquq qoruyıcılar bir şey añlatmadılar.
Hatırlatamız ki, Lenur Halilovnıñ bir sıra ağır hastalıqlar qayd etilgen edi: ilk ciğer kanseri, hronik hepatit C, ekinci derece gipertonia, qaraciğer kemikleri, sol böyrek şişigi ve büyrek taşları.
Onıñ hastalıqları Rusiye Federatsiyası ükümetiniñ 54-nci qararı ile tasdıqlanğan cedvelge kirsetile, oña köre, insan "umumiy rejimli müessisede tutulamaz" ve ihtisaslaştırılğan tibbiy müessisede tedaviylevni talap ete. Bu sebepten İsakogorsk rayon mahkemesi Halilovnıñ azat etilmesi aqqında qarar aldı.
Amma prokuror, mahkeme qararına itiraz bildirip, mahkeme qararınıñ "sağlıq vaziyeti apis cezasından boşatılmaq kerekligini köstermey", dep bildirdi.
Ukrayina Yuqarı Şurasınıñ insan aqları vekâletlisi Dmıtro Lubinets ağır hasta olğan Qırım siyasiy mabüsler Oleksandr Sizikov ve Lenur Halilovnıñ apishanege qaytarılmasını takbih etti. Ombudsman Rusiyege olarnı azat etmege çağırdı.
Uquq qorçalayıcı teşkilâtlar, Ukrayinağa qırımtatar siyasiy mabüsi Lenur Halilovnı deñiştirüv cedvellerine kirsetmege, Rusiyege — taqipni toqtatmağa, halqara toplulıqqa ise — azat etüv esnasında arabışçı olmağa talap etken beyanatnı derc etti.
Lenur Halilov aqqında ne bilemiz
Lenur Halilov — "Aluşta" mustaqil musulman cemiyetiniñ sabıq reisi.
2019 senesi ilk yaz ayınıñ 10-nda Qırımda dört qırımtatar musulmanınıñ evinde OMON, mahsus hızmetleri ve Aşırıcılıqnen küreş merkeziniñ hadimleri tarafından kütleviy tintüvler keçirildi. Aluştada quvetçiler imam vazifelerini eda etken Ruslan Nagayevni ve iş adamı Eldar Kantımırovnı, Malıy Mayak (Büyük Lambat) köyünde — Ruslan Mesutovnı, İzobilne (Körbekül) köyünde ise — Lenur Halilovnı tuttılar.
Em Mesutov, em de Halilov yerli din cemiyetleriniñ yolbaşçıları ediler. Apiske alınmazdan evel olar cemaat faaliyetinen oğraşa ediler: musulman bayramlarını teşkil ete, cenazelerge yardım ete, vesiqalarnı resmiyleştire, namaz keçire ediler.
2021 senesi arman ayınıñ 16-nda Cenübiy bölgeniñ arbiy mahkemesi Hizb ut-Tahrir davasınıñ "Aluşta gruppası"nıñ mebüslerine üküm çıqardı. Nagayev ve Kantımırov 13 ve 12 yılğa, Halilov ve Mesutov 18 yılğa üküm etildi. Soñkileri "terroristik gruppası"nıñ teşkilâtçıları, Nagayev ve Kantımırov ise onıñ iştirakçileri olaraq tanıldı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
