"Hizb ut-Tahrir" davasınıñ Aluşta gruppası çerçivesinde qanunsız şekilde 18 yılğa üküm etilgen Lenur Halilov hastalıq sebebinden azat etildi. Oña kanser diagnozı qoyuldı.
Siyasiy mabüs Umid Hudoyberdiyevniñ apayı "Qırım birdemligi"ne bunı bildirdi.
Arman ayınıñ 20-nde Arhangelskniñ İsakogorsk rayon mahkemesi Lenur Halilovnı azat etmege qarar aldı.
"Mahkeme RF Ceza qanunnamesiniñ 81 maddesine esaslanıp, hastalıq sebebinden apisten boşatıldı. Azat etilüv sebebi onıñ hastalığı apiske alınmasına mania olğanıdır", — dep haberde qayd etildi.
Siyasiy mabüsniñ tuvğanlarınıñ aytqanlarına köre, Rusiye Federal cezalandıruv hızmetiniñ hadimleri oña Qırımğa tren biletlerini satın aldılar.
İmam Lenur Halilov — "Hizb ut-Tahrir Aluşta gruppasınıñ davası"nıñ mabüsi, 18 yılğa üküm etildi. 2022 senesi orta küz ayından berli eki yıldan ziyade "Vladimir merkezi" apishanesinde buluna edi. 2025 senesi kiçik aydan berli — qanunsız şekilde Arhangelskteki 1-nci müstemlekesinde ceza çekken edi. Bu basamaqtan soñ siyasiy mabüs yarım yıl apishanede yattı. Bu sene o 57 yaşına kirdi.
Lenur Halilov aqqında ne bilemiz
Lenur Halilov — "Aluşta" mustaqil musulman cemiyetiniñ sabıq reisi.
2019 senesi ilk yaz ayınıñ 10-nda Qırımda dört qırımtatar musulmanınıñ evinde OMON, mahsus hızmetleri ve Aşırıcılıqnen küreş merkeziniñ hadimleri tarafından kütleviy tintüvler keçirildi. Aluştada quvetçiler imam vazifelerini eda etken Ruslan Nagayevni ve iş adamı Eldar Kantımırovnı, Malıy Mayak (Büyük Lambat) köyünde — Ruslan Mesutovnı, İzobilne (Körbekül) köyünde ise — Lenur Halilovnı tuttılar.
Em Mesutov, em de Halilov yerli din cemiyetleriniñ yolbaşçıları ediler. Apiske alınmazdan evel olar cemaat faaliyetinen oğraşa ediler: musulman bayramlarını teşkil ete, cenazelerge yardım ete, vesiqalarnı resmiyleştire, namaz keçire ediler.
2021 senesi arman ayınıñ 16-nda Cenübiy bölgeniñ arbiy mahkemesi Hizb ut-Tahrir davasınıñ "Aluşta gruppası"nıñ mebüslerine üküm çıqardı. Nagayev ve Kantımırov 13 ve 12 yılğa, Halilov ve Mesutov 18 yılğa üküm etildi. Soñkileri "terroristik gruppası"nıñ teşkilâtçıları, Nagayev ve Kantımırov ise onıñ iştirakçileri olaraq tanıldı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
