İşğalciler işğal etilgen Qırımnıñ benzin stantsiyalarında yaqarlıq satuvına yañı sıñırlavlarnı kirseteler — künde 20 litr "bir elge". Hatırlatamız ki, evel, benzin stantsiyasında maşna ya da kanğstrağa 30 litr almaq içün sıñırlav kirsetilgen edi.
Yañı sıñırlavlar aqqında işğalli Qırım yolbaşçısı Sergey Aksönov bildirdi.
Öz muracaatında Aksönov tanıdı ki, işğal etilgen yarımadada evelden kirsetilgen tedbirler, yaqarlıq stantsiyasında benzin qıtlığı vaziyetiniñ çezilüvinde neticeler bermedi. Bu sebepten Qırım sakinlerine az yaqarlıq satmağa qarar alındı, künde 20 litr sıñırlandı.
"Qarar alındı, yaqarlıq satışı sıñırlanacaq — bir kişige künde bir kere 20 litrden ziyade satılmaz. Aynı vaqıtta cemaat naqliyatı, içtimaiy obyektler, kommunal ve acele hızmetler tolu kölemde temin etile. Cumhuriyet toprağına kerekli yaqarlıqnıñ stabil teminatı aqqında malümat orta küz ayınıñ 3-ne qadar derc etilecek", — dep Aksönov bildirdi.
İşğal etilgen Qırımda "Qırım cenk çalğaları" adlı yerastı qarşılıq areketiniñ vekilleri yarımadadakş benzin stantsiyalarında nevbetler ve yaqarlıq biletlerinen bağlı spekulatsiya olğanını bildirdiler.
"Talonlar, spekulantlar ve nevbetler 2.20-lik şuralar sucuğı içün nevbetlerden daa uzun — Qırımnıñ benzin stantsiyalarında sizni böyle bekley. İşğalciler, adiy sakinler balalarnı mektepten alıp ketmegence, özlerine benzin töküp, aşırı yüksek fiyatlarğa satalar", — dep areketniñ haberinde bildirildi.
Qırımda yaqarlıq qıtlığı aqqında ne bilemiz
Arman ayınıñ soñundan yarımadada benzin qıtlığı kerginleşti: yaqarlıqnı diger şeerlerden qıdırmaq mecburlar, benzin stantsiyasında nevbetler peyda ola. İşğalli yolbaşçı Sergey Aksönov bozulğanlarnı tanıdı ve suv teminatını ğayrıdan tiklemege vade etti.
"Eki kün devamında benzin stantsiyalarını kerekli miqdarda AI-95 benzininen temin etmek planlaştırıla. Eki afta içinde AI-92 benzininiñ barlığı meselesi çezilecektir", — dep qayd etti o.
Ukrayina prezidentiniñ Qırım Muhtar Cumhuriyetindeki temsilciligi Suspilne Qırımğa işğalcilerniñ kerçekten de logistika meseleleri bar olğanını tasdıqladı.
"Qırım köprü bozulmadan evel partiyalar (benzin — terciman) demiryol naqliyatınen kele edi, partiyalar deñiz naqliyatınen kele edi. Silâlı quvetlerniñ muvafaqiyetli ücümlerinden soñ ve em Qırım köprü, em de deñiz teminatı bozulğan soñ, olar şimdi vazgeçtiler ve çoqusını maşna naqliyatınen temin etmege tırışalar", — dep Suspilne Qırımğa Ukrayina prezidentiniñ QMC daimiy temsilcisiniñ muavini Denıs Çıstikov bildirdi.
İşğalni ögrenüv merkeziniñ yolbaşçısı Petro Andrüşenko qayd etti ki, Qırımdaki yaqarlıq meselesi çezilse, büyük ihtimalnen bu Rusiye bölgeleri vastasınen olacaq.
"Qırımğa ne qadar alıp ketseler, o qadar, meselâ, Rostov vilâyeti, Kuban almaz. Demek ki, erte ya da keç Qırımğa kelir. Olar bunı belli bir müddetke toqtata bileler, Qırımnen daa bir kere muvafaqiyetsiz olğanını dünyağa köstermemek içün", — dep İşğalni ögrenüv merkeziniñ yolbaşçısı ayttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
