İlk küz ayınıñ 29-nda başlap işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) benzin satıluvına sıñırlav kirsetildi. TES ağınıñ benzin stantsiyalarında aydavcılar "bir elge" — maşna ya da bir kanistrni yaqarlıqnen toldurmaq içün eñ çoq 30 litr AI-100, AI-95NP, AI-95 ve AI-92 markalarınıñ yaqarlığını ala bileler.
İşğalli Sevastopol (Aqyar) gubernatorı Mihail Razvojayev bunı bildirdi.
Onıñ aytqanına köre, bu kibi tedbirler yaqarlıq teminatınen vaziyetni eyileştirmeli.
"Bu rejim sayesinde bütün stantsiyalarda benzin toplaycaqmız ve adiy cedvel boyunca çalışıp başlaycaqmız, dep tüşünemiz. Şunıñ içün, tekrar aytam, yedek yapmañız", — dep o qayd etti.
O şunı da qoştı ki, şeerge benzinni "non-stop" rejiminde ketireler, amma aşırı istek sebebinden iş planlaştırılğan rejimde çalışmay.
UPD// İşğalli Qırım yolbaşçısı Aksönov bildirdi ki, işğal etilgen yarımadada ilk küz ayınıñ 29-dan başlap "bir elge" 30 litrden ziyade yaqarlıq satılmasına sıñır kirsetilecek. Bundan da ğayrı, yaqın 30 kün devamında yaqarlıq fiyatı sıñırlanacaq.
"Dizel yaqarlığı — litri içün75 rubleden (qararnen 33-34 ğrıvnâ), AI-92 markalı benzin — litri içün 70 rubleden (34 ğrıvnâ), AI-95 markalı benzin — litri içün 76 rubleden (37 ğrıvnâ), AI-95 Premium markalı benzin — litri içün 80 rubleden (39 ğrıvnâ) çoq degil. Bugünden başlap, er adamğa 30 litrden ziyade benzin satılmaycaq. Qırım sakinlerinden yedek benzin satın almağanlarını ve naqliyat vastalarına adet üzre benzin toldurğanlarını rica etem", — dep Aksönov bildirdi.
Bundan da ğayrı, işğalli memur er kün "Qırım Cumhuriyeti yaqarlıq ve energetika nazirligi"niñ saytında yaqarlıq olğan stantsiyalarnıñ aktual adreslerini derc etmege söz berdi ve bütün içtimaiy obyektler, kommunal ve acele hızmetler tam miqdarda yaqarlıqnen teminlengenini qayd etti.
Qırımda yaqarlıq qıtlığı aqqında ne bilemiz
İşğalli Qırım yolbaşçısı Sergey Aksönov bildirdi ki, yaqarlıq qıtlığı Rusiyeniñ yermay zavodlarında "mahsulatnıñ eksilüvi" sebebinden peyda oldı.
"Eki kün devamında benzin stantsiyalarını kerekli miqdarda AI-95 benzininen temin etmek planlaştırıla. Eki afta içinde AI-92 benzininiñ barlığı meselesi çezilecektir", — dep qayd etti o.
Ukrayina prezidentiniñ Qırım Muhtar Cumhuriyetindeki temsilciligi Suspilne Qırımğa işğalcilerniñ kerçekten de logistika meseleleri bar olğanını tasdıqladı.
"Qırım köprü bozulmadan evel partiyalar (benzin — terciman) demiryol naqliyatınen kele edi, partiyalar deñiz naqliyatınen kele edi. Silâlı quvetlerniñ muvafaqiyetli ücümlerinden soñ ve em Qırım köprü, em de deñiz teminatı bozulğan soñ, olar şimdi vazgeçtiler ve çoqusını maşna naqliyatınen temin etmege tırışalar", — dep Suspilne Qırımğa Ukrayina prezidentiniñ QMC daimiy temsilcisiniñ muavini Denıs Çıstikov bildirdi.
İşğalni ögrenüv merkeziniñ yolbaşçısı Petro Andrüşenko qayd etti ki, Qırımdaki yaqarlıq meselesi çezilse, büyük ihtimalnen bu Rusiye bölgeleri vastasınen olacaq.
"Qırımğa ne qadar alıp ketseler, o qadar, meselâ, Rostov vilâyeti, Kuban almaz. Demek ki, erte ya da keç Qırımğa kelir. Olar bunı belli bir müddetke toqtata bileler, Qırımnen daa bir kere muvafaqiyetsiz olğanını dünyağa köstermemek içün", — dep İşğalni ögrenüv merkeziniñ yolbaşçısı ayttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
