Vaqtınca işğal etilgen Ukrayina topraqlarında qadınlarnı taqip etüv Rusiye Federatsiyasınıñ ayrı bir siyaseti oldı. İşğal etilgen Qırımda Rusiye akimiyeti qadınlarğa qarşı repressiyalarnı sert cezalar, "devlet hainligi" ve "casuslıq" maddeleri ve balalarnı alıp ketmek qorquzuvlarınen bilerek quvetleştirdi.
Qırım uquq qorçalayıcı gruppasınıñ reisi Olğa Skrıpnık siyasiy mabüslerniñ aqlarınıñ bozuluvına bağışlanğan matbuat brifinginde bunı bildirdi.
"Qırımda qadınlar birden qarşılıqqa qoşuldı, olar er aktsiyada iştirak etti ve yarımadda işğal etilgen soñ da narazılıqlarını devam ettirdiler. İşte bu sebepten bugün qadınlarnıñ taqip etilüvi Rusiye mahsus hızmetleriniñ ayrı bir maqsadı olğanını eminmiz", — dep Skrıpnık bildirdi.
O hatırlattı ki, 2022 senesinden soñ repressiyalarnıñ miqyası bayağı arttı,.
"Tolu miqyaslı istilâdan evel qadın içün eñ büyük ceza 12 yıl apis cezası edi. Bugün bizler 16 ve atta 22 yıllıq cezalarnı köremiz", — dep Skrıpnık qayd etti.
Balalarnı basqı aleti olaraq qullanuv hususan qasevet doğura.
"Bizde qadınlardan balalarnı alıp ketmege tırışqan vaqialar bar. Bu, olar içün eñ ağır şey ola bile edi, ve bu basqı altında qadınlar FSB hadimleri talap etken er angi vesiqanı imzalay ediler", — dep uquq qorçalayıcı qayd etti.
O qayd etti ki, qadınlarnıñ taqip etilüvinen beraber sağlıq vaziyeti de körmemezlikke urula.
"Bizde, onıñ hastalığına emiyet bermey, on yıl apis cezasına mahküm etilgen kanser hastalığı olğan qadınlar bar. Aynı şey küçük balalı analar ya da qart ana-babalarnı baqqanlarğa da aittir", — dep qayd etti o.
ZMINA İnsan aqları merkeziniñ leyhalar idarecisi Viktoriya Nesterenko, siyasiy mabüslerniñ tibbiy teminatınen vaziyetniñ kerginleşkenini köstergen monitoring neticelerini taqdim etti.
"2023 senesi nezaretimizniñ başında, hastalıqları olğan 70 siyasiy mabüs bar edi, olarnıñ yarısı yardımnı red ete edi. Şimdi böyle insanlarnıñ sayısı yüzge yaqın", — dep Nesterenko qayd etti.
Onıñ aytqanına köre, bu vaqialar vesiqalı şekilde tasdıqlana.
"Advokatlar ve soy-soplardan tibbiy yardım kösterilmemesi aqqında malümatımız bar. Eki vaziyette bu siyasiy mabüslerniñ ölümine ketirdi", — sep qayd etti o.
Nesterenko şunı da qoştı ki, işğalli akimiyetniñ areketleri işkence añlamına kire.
"Bu bozuvlarnıñ episi işkence ve insaniyetsizlik kibi tanıla bile. Rusiye, işğalli akimiyet olaraq, tibbiy yardım aqqını temin etmek kerek, amma biz vaziyetni tam tersine köremiz", — dep uquq qorçalayıcı yekünledi.
"QırımSOS" teşkilâtı idaresiniñ yolbaşçı muavini Lüdmıla Şevçenko da qayd etti ki, siyasiy mabüs qadınlar temel tibbiy yardımnıñ olmağanını pek ağır is ete.
"Bilgenimiz kibi, İrına Danılovıç hırsızlanğan vaqıt sağlam bir qadın edi. Bugün o, bir qulaqtan eşitme qabiliyetini yoq etti, çünki oña temel tedaviylevni köstermediler", — dep qayd etti o.
Lüdmila Şevçenko Viktoriya Roşçınanıñ facialı adisesi aqqında da hatırlattı.
"Eger de Viktoriya Roşçınağa tibbiy yardım bermege red etmegen olsa ediler, onı deñiştürğv vastasınen alır edik. Amma tedaviylenilmegeni sebebinden o elâk oldı", — dep qayd etti o.
Uquq qorçalayıcılar işğal etilgen topraqlarda siyasiy mabüslerniñ aqları bozulğanı aqqında malümatnı tarqatmağa çağırdılar. Olar qayd eteler ki, cemiyet diqqatı ve halqara destek qadınlarnıñ ailelerine qaytmaq ve ayatlarını qorçalamaq imkânlarını arttıra bile. Er bir aydınlatılğan ikâye işğalli akimiyetke basqı yapmaq içün müim bir alet ola ve dünya toplulığınıñ diqqatını celp etmege yardım ete.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
