Zelenokumsk şeerinde qadın müstemlekesinde qanunsız tutulğan siyasiy mabüs İrına Danılovıç müessise memuriyeti tarafından muntazam sürette taqip etilgenini bildirdi. Onıñ yaqınlarınıñ aytqanlarına köre, o, Danılovıçnıñ vaziyetine baqqan Avropa parlamentiniñ vitse prezidenti Pina Piçernoğa muracaat etip, bu faktlarnı bildirdi.
"Tribunal. Qırım epizodı" uquq qorçalayıcı teşebbüsi bunı bildirdi.
Muracaatında uquq qorçalayıcı, müstemlekede tutuluv şaraiti insaniyetsizlik olğanını qayd etti, ve mabüslerge tesir etüv usullarını ise, gestapo usullarına beñzetti.
"Asılında, bir qaç yüz qadınğa, gece-kündüz aydınlatqan elektrik yarıqları söndürilmey, dep izsiz işkence yapıla. Fenerlerniñ tesiri o qadar küçlü ki, közleri bağlanğanlar bile yardım etip olamay. Bu sebepten insanlarnıñ uyquları bozula, közleri ağıra", — dep aytıla haberde.
İrına Danılovıçnıñ aytqanına köre, saba saat altıdan başlap baraklarda bir qaç saat devamında ses arttırıcı aletler pek yüksek seviyede çalışa.
"Bunıñ içün er kün azaplanalar, İrına Danılovıçnıñ qızarğan işitme organları içün ise qaçınılmaz fizikiy ağrı menbası ola. Danılovıç bunı Gestapo — Almaniyanıñ gizli polisi — hadimleriniñ cinayetleri aqqında tarihiy edebiyatta oquğan usullarnen qıyasladı", — dep uquq qorçalayıcılar bildirdiler.
Evel İrına Danılovıç ağır sanitar-turmuş vaziyeti ve başqa zorbalıqlar, hususan yağmur ya da suvuq avada çoq vaqıt çardaqta turmaq şeklinde defalarca cezalar aqqında haber etken edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
