Ukrayinanıñ vaqtınca işğal etilgen topraqlarında, şu cümleden Qırımda, yaqarlıq olmağanı sebebinden yaqarlıq stantsiyaları belgisiz müddetke qapatıla.
İlk küz ayınıñ 26-nda Ukrayina Silâlı quvetleriniñ mahsus operatsiyalar quvetleriniñ komandanlığı uzurındaki bölük — Milliy muqavemet merkezi (MMM) Facebook saifesinde bu aqqında haber etti.
"Şimdilik qapatıluvlar muvaqqat, amma muvaqqat müddet sıq-sıq uzatıla. Qırımdaki eñ yaramay vaziyet, eñ az qapatılğan yaqarlıq stantsiyaları Zaporijjâda. Bu, Rusiye reberliginiñ cenk çağıruvlarınen oğraşmaq ve işğal etilgen topraqlarnıñ ihtiyaclarını körmemezlikke urmaq qabiliyetiniñ neticesidir", — dep MMM qayd etti.
Qırımda yaqarlıq qıtlığı aqqında ne bilemiz
İlk küz ayınıñ 25-nde yerli sakinniñ Suspilne Qırımğa aytqanına köre, keçken raatlıq kününden evel benzin meselesi kerginleşti, şimdi ise yarımadada yaqarlıq tapmaq mümkün, lâkin onı almaq içün bazıda başqa şeerlerge barmaq kerek.
Daa evel işğalli Qırım yolbaşçısı Sergey Aksönov bildirdi ki, yaqarlıq qıtlığı Rusiyeniñ yermay zavodlarında "mahsulatnıñ eksilüvi" sebebinden peyda oldı.
"Eki kün devamında benzin stantsiyalarını kerekli miqdarda AI-95 benzininen temin etmek planlaştırıla. Eki afta içinde AI-92 benzininiñ barlığı meselesi çezilecektir", — dep qayd etti o.
Ukrayina prezidentiniñ Qırım Muhtar Cumhuriyetindeki temsilciligi Suspilne Qırımğa işğalcilerniñ kerçekten de logistika meseleleri bar olğanını tasdıqladı.
"Qırım köprü bozulmadan evel partiyalar (benzin — terciman) demiryol naqliyatınen kele edi, partiyalar deñiz naqliyatınen kele edi. Silâlı quvetlerniñ muvafaqiyetli ücümlerinden soñ ve em Qırım köprü, em de deñiz teminatı bozulğan soñ, olar şimdi vazgeçtiler ve çoqusını maşna naqliyatınen temin etmege tırışalar", — dep Suspilne Qırımğa Ukrayina prezidentiniñ QMC daimiy temsilcisiniñ muavini Denıs Çıstikov bildirdi.
İşğalni ögrenüv merkeziniñ yolbaşçısı Petro Andrüşenko qayd etti ki, Qırımdaki yaqarlıq meselesi çezilse, büyük ihtimalnen bu Rusiye bölgeleri vastasınen olacaq.
"Qırımğa ne qadar alıp ketseler, o qadar, meselâ, Rostov vilâyeti, Kuban almaz. Demek ki, erte ya da keç Qırımğa kelir. Olar bunı belli bir müddetke toqtata bileler, Qırımnen daa bir kere muvafaqiyetsiz olğanını dünyağa köstermemek içün", — dep İşğalni ögrenüv merkeziniñ yolbaşçısı ayttı.
Aynı zamanda Ukrayina tış istihbarat hızmetiniñ sabıq yolbaşçısı ve general Mıkola Malomuj tüşüne ki, içki qıtlıq Rusiye iqtisadiyatına zarar ketirecek, çünki Rusiye neftiniñ ihracatı eksiltilecek,.
"Rusiye bugün bir sıra memleketniñ, neft, neft mahsulatı, gaz satın aluvını sıñırlav sanktsiyalarına qol tutmağanından faydalana. Bu, esasen, İndistan, qısmen Türkiye, Çin, İran, Rusiyenen alâ daa ticaret yapqan bir çoq memleket aqqında söz yürsete. Bu ise, mütenasip olaraq, yermay ve yermay işlevidir. Bu resurslarnıñ yoq etilmesi — bu onlarca milliard dollarlıq qazançnıñ bozulmasıdır, ve bu para doğrudan cenkke ketirildi. Bugün Rusiyeniñ strategik maliye resursları yoq, neft, neft mahsulatları ve gaz ticaretinden ğayrı. Onıñ içün bu vaziyette bu Rusiyeniñ arbiy maşnasına ve, añlaşılır ki, maliyeviy maşnasına eki kerelik ücüm", — dep añlattı o.
Qıtlıq benzin fiyatınıñ artmasına yol berdi. Bazı şirketler hadimlerine yaqarlıq kuponlarını bere başladılar. Arbiy mütehassıs, "Strategiya XXI" Globalist Merkeziniñ telükesizlik programmalarınıñ reberi Pavlo Lakiyçuk qayd etti ki, bu imkânnı gizli bazar qullanacaq.
"Bazar kölgege tüşe, tertip etilmey. Yani, açıq temiz bir bazar olsa — anda istisal etilgen, satılğan, qullanılğan mallarnıñ keyfiyetini körmek mümkün. Gizli sektorda — seniñ meseleñ: ya al, ya da bazarğa barıp qıdır. Onıñ qayd etkenine köre, yaqarlıqnıñ keyfiyeti bu vastalarnıñ iş keyfiyetine tesir ete", — dep qayd etti o.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
