Oraq ayınıñ 28-nde, Esirlikte elâk olğan qorçalayıcılar, göñülliler ve vatandaşlarnıñ hatıra künü, "Sarı şerit" vatandaşlıq qarşılıq areketi Ukrayinanıñ vaqtınca işğal etilgen topraqlarında, şu cümleden Qırımda, 50-den çoq ukrayinalı esir elâk olğan ve eñ az 130 yaralanğan Olenivkadaki Rusiye teraktınıñ fedalarını ürmetnen añmaq içün sessiz aktsiya keçirdi.
Areket, öz Telegram kanalında bu aqqında haber etti.
Aktsiya vaqtınca işğal etilgen Donetsk, Melitopol, Luğansk, Geniçesk, Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad), Simferopol (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) ve Bağçasaray şeerleriniñ sakinleri tarafından keçirildi.,
"Üç yıl evel ruslar, Olenivkada esir etilgen "Azovstal" qorçalayıcılarını öldürdiler. Rusiyeniñ içi qaralığı er vaqıt yalan, işkence ve qorqunen teñ kele — bu, er kün körgen duşmannıñ yüzüdir. Ukrayina Mudafaa quvetlerine er birimiz içün küreşkenleri içün teşekkür bildiremiz", — dep "Sarı şerit" koordinatorları qayd ettiler.
Hatırlatamız ki, oraq ayınıñ 23-nde Ukrayina Yuqarı Şurası oraq ayınıñ 28-nde Esirlikte elâk olğan, azaplanıp öldürilgen ya da öldürilgen Ukrayina qorçalayıcıları, göñülli birleşmeler iştirakçileri ve vatandaşlarnıñ hatıra kününi qayd etüv aqqında qararnı qabul etti.
Yañı hatıra künü, 2022 senesi oraq ayınıñ 29-na keçer gecesi Rusiye ordusınıñ teraktı neticesinde 53 ukrayinalı esirniñ — "Azovstal"nıñ qorçalayıcısınıñ — elâk olğanı Olenivkadaki faciağa bağışlandı.
Olenvikadaki terakt. Tahqiqat aqqında ne bilemiz
Ukrayina uquq qorçalayıcıları 120-nci Volnovaha müstemklekesinde yüz bergen patlavnı cenk qanunları ve adetleriniñ bozuluvı olaraq teşkereler. Baş prokurornıñ ofisiniñ oraq ayınıñ 29-nda Facebookta derc etkeni malümatqa köre, patlavlar oraq ayınıñ 28-nde saat 23:00 ve oraq ayınıñ 29-nda saat 01:00 arasında yüz berdi. Tahqiqatnıñ malümatına köre, o vaqıt barakta "Azov" polkunıñ 193 esiri tutula edi.
İşğal etilgen Olenivka şeerinde 120-nci Volnovaha tüzetüv müestemlekesiniñ toprağında yüz bergen patlav neticesinde anda esirlikte bulunğan eñ az 50 ukrayin arbiy hızmetçisi elâk oldı, tahminen 150 insan yaralandı, dep bildirdi UBPO. O qayd etti ki, elli esirden doquzı vaqtında berilmegen ve yaramay tibbiy yardım neticesinde elâk oldı.
Baş prokurorlıqnıñ malümatına köre, tahqiqat devamında tahqiqatçılar ve prokurorlar 20 zarar körgenniñ ve 30-dan çoq şaatnıñ ifadelerini aldılar, 48 mahkeme-tibbiyet ekspertizası keçirildi, şu cümleden molekulâr-genetik ekspertizalar, silâ ve onıñ qullanuv şaraiti ve izleriniñ kompleks ekspertizası keçirildi.
Ofisniñ bildirgenine köre, 49 arbiy hızmetçiniñ cesedi tapıldı ve, 48-i — mahkeme molekulâr-genetik ekspertizalarınıñ neticelerine köre, ve daa 1-i — zarar körgenlerniñ ve şaatlarnıñ ifadelerinden tanıldı.
Oraq ayınıñ 29-nda Ukrayina havfsızlıq hızmeti, tahqiqatnıñ malümatına köre, arbiy esirlerni tutqan Olenivka müstemlekesini idare etken eki adamğa şübhe bildirdi. UHH, şübhelilerniñ adlarını bildirdi — Serğiy Yevsükov ve Dmıtro Neyolov.
Tahqiqatçılarnıñ malümatına köre, oraq ayınıñ 29-nda gece baraklardan birinde patlav yüz bergen vaqıt bu eki adam 2022 senesi "vazifeleri"ni eda etken edi.
"Eki şahıs da patlavlarnıñ aqibetleri ve yaralanğanlarnıñ sayısı aqqında bile edi, amma yaralanğanlarnı tibbiy müessiselerge alıp barmaqnı bilerek toqtatqan ediler", — dep haberde qayd etildi.
Havfsızlıq hızmetiniñ taqiqatçıları ekisine Ukrayina Ceza qanunnamesiniñ 28-inci maddesiniñ 2-nci qısmı ve 438-inci maddesiniñ 2-nci qısmına istinaden bir gruppa tarafından yapılğan qabaatlı cinayetnen birleştirilgen esirlerge nisbeten sert davranuvda şübhe bildirdiler.
Bundan ğayrı, UHH bildirdi ki, 2022 senesi boş ayda eki işğalcini "vazifeleri"nden çıqarıldı, şimdi olar Donetsk vilâyetiniñ vaqtınca işğal etilgen qısmında saqlanalar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
