İşğal etilgen Qırımda ultra sağ "Rus cemiyeti"nen bağlı bir formal olmağan qurulış çalışmağa başladı. Olar yarımadanıñ şeerlerinde patrul içün "müfreze"ni teşkil eteler. 40 kişiden çoq endi bu gruppalarğa qoşuldı.
Oraq ayınıñ 17-nde yerli faalci "Qırım.Aqiqat" neşirine anonim şekilde bunı bildirdi.
Onıñ aytqanına köre, oraq ayınıñ 12-de Simferopolda (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adte) "Rus cemiyeti"niñ konferentsiyasında koordinator Andrey Tkaçuknıñ iştirakinen komandan, parlamentçi, operator ve eki askerden ibaret olğan arbiy "beşlik"lerni meydanğa ketirmek qararı alındı.
İlk "patrullar" Simferopolda (Aqmescitte) aqşam başlamaq kerek, "müfreze" reberligi ise yerli "akimiyet" ve Rusiye quvet strukturalarınen bağ qurmaq vazifesini aldı, dep faalci añlattı.
Resmiy "Qırımnıñ rus cemiyeti" olsa da, aynı adı olğan, iştirakçileri açıqtan-açıq radikal ğayelerge qol tutqan ve resmiy statusı olmağan bir formal olmağan teşkilât inkişaf ete.
Bundan evel Suspilne Qırım muarririyeti işğalcilerniñ aşırıcılıqnen küreş adı altında Qırımdaki muhalifetni yoq etkenleri aqqında tarif etti. Jurnalistler Qırım advokatı ve Rusiye İçki işler nazirliginiñ, daa çoq "E merkezi" olaraq belli olğan, aşırıcılıqnen küreş merkezinde tutulğan Qırımdan qadınnen anonimlik şartlarında laf ettiler.
Bundan evel de Suspilne Qırım jurnalistleri, Ukrayinağa qol tutqan ealiniñ taqip etilmesinde iştirak etken eki Qırım sakini — Ruslan Şambazov ve onıñ qardaşı Artur aqqında tarif ettiler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
