Qırımda "E" Merkezi — aşırıcılıqqa qarşılıq etken işğalli İİNniñ bölügidir. Faalciler, uquq qorçalayıcılar ve jurnalistlerni taqip etmek içün 10 senedir işğalciler onı qullanalar. Olar arasında sahte davalarnı açqan Qırımdaki "Aşırıcılıqqa qarşılıq merkezi"niñ başı Ruslan Şambazov 2024 senesi kiçik ayda uquq qorçalayıcı Lütfiye Zudiyevanı tutmağa yardım etti.
Suspilne Qırım Qırımdan duşmannen işdeşlik yapqan eki insan Ruslan Şambazov ve qardaşı Artur aqqında añlata. Olar, ukrain taraflı ealini taqip etmege yardım eteler.
Böylece, bir qaç sene evel işğal etilgen Qırımda jurnalist Oleksandra Yefımenko sahte davalarnı aydınlata edi, amma 2021 senesi küz mevsiminde öz eviniñ ögünde qara şeritnen bağlanğan eki qırmızı qaranfilni taptı ve içtimaiy ağlarda anonim esaplarnıñ şübeli faaliyetini kördi. Yefımenko Suspilne Qırımğa añlatqanı kibi, "E" Merkezi ve Ruslan Şambazov onı taqip ete.
"Ruslan Şambazov — Qırımda "E" Merkeziniñ işçisi ve içtimaiy ağlarnen bağlı türlü davalarnı idare ete. Onıñ açqanı sahte esaplarını bir qaç kere taptım, çünki er bir dava şekillengende davanıñ bilgilerinde böyle degen operativ iş keçirilgeni esapnıñ adını körmek mümkün. Ve bir qaç kere men, onıñ açqanı sahte esaplarını Facebookta dostlarım cedcelinde taptım, – dep jurnalist qayd etti.
O emindir ki, Şambazovnıñ vazifesi — içtimaiy ağlarda rus akimiyetinen razı olmağan Qırımda yaşağan qırımtatarlar ve ukrainalılarnı tapmaqtır. Yefomenkonıñ qoşqanı kibi, o — jurnalist Lütfiye Zudiyeva, advokat Edem Semedlâev ve Emil Kurbedinov, içtimait ağlarda "natsizm timsallerini teşviqat etüv", "RF SQni itibardan tüşürüv" ve "internette söz azatlığınıñ suistimalı" sebebinden soñ eki sene devamında SİZOda bulunğan uquq qorçalayıcı Abdureşit Cepparovğa qarşı memuriy davalarnıñ teşebbüsçisidir.
Tamam Cepparovnıñ taqibi sebebinden ukrain uquq qorçalayıcıları Ruslan Şambazovğa qarşı dava açmağa çalışalar, dep Qırım MC ve Aqyar şeeriniñ prokurorlığı Suspilne Qırımğa haber berdi.
Aynı zamanda "Yevromaydan"nıñ faalcisi Oleksandr Kostenkonı azaplağanı sebebinden 2022 senesi ukrain makemesi Artur Şambazovnı ğıyabiy şekilde 10 senege maküm etti.
Meclisniñ başı refat Çubarov Suspilne Qırımğa añlattı ki, Şambazov qardaşları muntazam tarzda qırımtatarlarnı taqip eteler.
"Qırım işğal etilgen soñ olar sanki deli olğanlar, çünki olarnıñ nasıldır ruhiy hastalığı bar, qırımtatarlarğa hususiy nefreti bar, bu eki qardaş insanlarnı tarik etkenleri, sahte malümat çaqqanlarınen bellilerdir, olarnıñ vazifes qırımtatarlarnı azaplamaqtır", — dep Çubarov qayd etti.
Onıñ sözlerine köre, bir qaç siyasiy mabüs halq ögünde taqipler ve repressiyalar aqqında haber berdiler. Olarğa ekisi ya da biri qardaş bağlıdır. Olar arasında eski siyasiy mabüs İsmail Ramazanov. 2018 senesi rus quvetçileri onı aşırıcılıqta ve silâ saqlamağa qabaatlağan soñ tamam Artur Şambazovnen körüşti.
"Evimni tintkende Şambazov maña Makarov pıştavınen 24 patron ve aşırıcı edebiyatnı gizlen evimde saqladı. Olar meni qırımtatar batalyonınıñ faaliyetinen, Qırımdaki nasıldır diversiya gruppalarınıñ faaliyetinen nasıldır bağlandırmağa istey ediler", — dep İsmail Ramazanov Suspilne Qırımğa ayttı.
O qayd etti ki, FSB işçileri onı tutıp urdılar ve elektrik aqımnen azaplamağa qorquttılar.
"Olar şunı ayttılar: "Seniñ ağalarıñdan biri elektrik aqımnı dayanamadı". Buña köre men netice çıqardım ki, olar qırımtatarlarğa qarşı çoq kere elektrik aqımnı qullandılar. Şambazovdan da bunı eşittim. Men şağada oqumağa başalağan soñ Şambazov maña şunı ayttı: "Şaat olaraq ölmege ümüt etesiñ", men ise cevap berdim ki, er şey siziñ ve Allanıñ ellerindedir. Men bunı aytqan soñ olar meni daa çoq urmağa başladılar", — dep Ramazanov ayttı.
Altı aydan soñ siyasiy mabüs SİZOdan azat etildi ve ev tevqifi astında bulunğan edi, birazdan advokatı Oleksiy Ladin aşırıcılıqnen bağlı qabaatını lâğu ettire bildi. Bundan soñ İsmail işğal etilgen Qırımdan ketti.
"Men ümüt etem ki, bu insanlarnıñ ve Şmabazovnıñ tevqif olmaları, ukrain ve halqara qanunlarına binaen mesüliyet çekmeleri içün er şey yapamız. Olar qanunlarnı çoq kere bozdılar: insanlarnı hırsızladılar, azapladılar, alâ daa yapmağa devam etkenleri taqip ettiler", — dep eski siyasiy mabüs qayd etti.
2014 senesi Artur Şambazov Ukraina havfsıqlıq hızmetinde çalışqan edi. Suspilne Qırımnıñ jurnalist muracaatına UHH bunı tasdıqladı.
"Ukraina vatandaşı Şambazov Artur reberlikniñ emirini yerine ketirmedi, bunıñ içün UHHde arbiy hızmetteb çıqarıldı. Şu anda o, böyle degen Qırım Cumhuriyeti ve Aqyar şeerindeki RF FSBniñ idaresiniñ operativ işçisi olıp çalışa”, — dep bildirildi.
UHHniñ bilgilerine köre, Arturnıñ qardaşı — Ruslan Şambazov 2014 senesine qadar Qırım MCde Ukrainadaki İİNniñ Bİniñ polisiniñ qaravul-noqta hızmetiniñ ayrı batalyonında hızmet etti. Qırım işğal etilgen soñ antını bozdı ve RF vatandaşlığını aldı. Bundan ğayrı, qardaşlar başqa uquq qorçalayıcı organlarnıñ cinaiy davalarınıñ iştirakçileridir, dep hızmet haber berdi.
Telegram ve Facebookta Suspilne Qırım haberlerine abune oluñız
