Ukrayina Tış işler nazirligi, Yevromaydan faalcisi Andriy Kolomiyets Rusiyede 10 yılğan qanunsız sürette apiske alınğan soñ Ukrayinağa qaytqanını tasdıqladı. Bugün o Moldova-Ukrayina sıñırından keçti.
Brifingde Tış işler nazirliginiñ spikeri Georgiy Tıhıy bunı bildirdi.
Onıñ aytqanına köre, Andriy Kolomiyets Ukrayinağa Gürcistan ve Moldova üzerinden qayttı. Rusiye apishanesinde bulunğan vaqıt onıñ vesiqalarınıñ müddeti bitti, şunıñ içün Gürcistandaki elçihanede vesiqalar tez resmiyleştirildi.
Hatırlatamız ki, oraq ayınıñ 8-nde belli oldı ki, Yevromaydan faalcisi, siyasiy mabüs Andriy Kolomiyets Rusiye-Gürcistan sıñırındaki Yuqarı Lars nezaret noqtasında, Şimaliy Osetiyada tutula. Onıñ apayı Ğalına Kolomiyets Suspilne Qırımğa bunı bildirdi.
Andriy Kolomiyets Suspilne Qırımğa Gürcistan sıñırında eki kün bulunğanını ve bufer zonasında tutulğan şaraitten şikâyet etkenini bildirdi.
2015 senesi Andriy Kolomiyets Rusiyeniñ Kabardino-Balkaristanda narkotik saqlağanında şübheli sayılıp tutuldı, Qırımğa ketirildi ve "Berkut" mahsus bölüginiñ eki Qırım hadimini öldürüvde qabaatlandı. 2016 senesi Kıyiv vilâyetiniñ sakini Qırımda 10 yıl sert rejimli apis cezasına mahküm etildi. Kolomiyets özü bütün qabaatlavlarnı red ete. Adliyeciniñ aytqanına köre, qabaatlavnıñ delillerinden tek eki qara-beyaz fotoresimi bar. 2025 senesi qara qış ayınıñ 15-nde Krasnodar müstemlekesinden çıqtı. Siyasiy mabüs bundan soñ tutuldı ve Rusiye İçki işler nazirliginiñ Gülkeviç rayonındaki çetel vatandaşlarını vaqtınca tutuv merkezine alıp ketirildi.
Ertesi künü Rusiye mahkemesi onı çetel vatandaşlarını vaqtınca tutuv merkezine çiçek ayınıñ 14-ne qadar yerleştirmege qarar berdi. Çiçek ayınıñ 23-nde Qırım uquq qorçalayıcı gruppası bildirdi ki, ukrayinliniñ Merkezde bulunma müddeti 90 künge uzatıldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
