On yıllıq qanunsız apis cezasından soñ Rusiye tarafından Gürcistan kiriş noqtasına sürgün etilgen siyasiy mabüs Andriy Kolomiyetske kerekli ukrayin vesiqaları berildi.
Ukrayina Tış işler nazirligi Suspilne Qırımğa bunı bildirdi. Andriy Kolomitets özü de vesiqalarnı alğanını tasdıqladı.
"Gürcistan ve Moldovadaki Ukrayina elçihaneleri eñ yaqın vaqıtta Ukrayina vatandaşı Andriy Kolomiyetsniñ qaytarıluvı içün maniasız tranzit teşkil etmek içün faal çalışalar", — dep TİNniñ haberinde aytıla.
Hatırlatamız ki, oraq ayınıñ 8-nde belli olğanı kibi, Yevromaydan faalcisi, siyasiy mabüs Andriy Kolomiyets Rusiye-Gürcistan sıñırındaki Yuqarı Lars kontrol noqtasında tutulğan edi. Onıñ apayı Ğalına Kolomiyets Suspilne Qırımğa bunı bildirdi.
Andriy Kolomiyets özü, o vaqıt eki künden ziyade Gürcistan sıñırında bulunğanını bildirdi. O, bufer zonasında tutulğan insaniyetsiz şaraitten şikâyet etti.
"Bizler mağazada bulunamız. Bu, vokzaldaki maşaza kibi — bir şey yoq, tabanda taşçıqlar. Duvarlar, köyde bir uru kibi. Tınçlıq, avalandırma yoq. Avağa çıqmağa yasaq etile", — dep siyasiy mabüs tarif etti.
2015 senesi Andriy Kolomiyets Rusiyeniñ Kabardino-Balkaristanda narkotik saqlağanında şübheli sayılıp tutuldı, Qırımğa ketirildi ve "Berkut" mahsus bölüginiñ eki Qırım hadimini öldürüvde qabaatlandı. 2016 senesi Kıyiv vilâyetiniñ sakini Qırımda 10 yıl sert rejimli apis cezasına mahküm etildi. Kolomiyets özü bütün qabaatlavlarnı red ete. Adliyeciniñ aytqanına köre, qabaatlavnıñ delillerinden tek eki qara-beyaz fotoresimi bar. 2025 senesi qara qış ayınıñ 15-nde Krasnodar müstemlekesinden çıqtı. Siyasiy mabüs bundan soñ tutuldı ve Rusiye İçki işler nazirliginiñ Gülkeviç rayonındaki çetel vatandaşlarını vaqtınca tutuv merkezine alıp ketirildi.
Ertesi künü Rusiye mahkemesi onı çetel vatandaşlarını vaqtınca tutuv merkezine çiçek ayınıñ 14-ne qadar yerleştirmege qarar berdi. Çiçek ayınıñ 23-nde Qırım uquq qorçalayıcı gruppası bildirdi ki, ukrayinliniñ Merkezde bulunma müddeti 90 künge uzatıldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
