İşğalciler tarafından 16 yıl apis cezasına mahküm etilgen vatandaş jurnalisti, qırımtatar Seyran Saliyev, Rusiyeniñ Tula vilâyetindeki 4-nci tüzetüv müstemlekesinde kene ceza izolâtorına (ŞİZO) yerleştirildi.
Oraq ayınıñ 2-nde onıñ ömür arqadaşı Mümine Saliyeva "Qırım birdemligi" cemaat teşkilâtına bergen izaatında bunı ayttı.
Onıñ aytqanına köre, Seyran ilk yaz ayınıñ 10-dnan berli ŞİZOda buluna. Bu adam daa evel 2024 senesi boş aynıñ 20-nden 2025 senesi saban ayınıñ 1-ne qadar anda tutula edi.
Mümine Saliyeva ilk yaz ayınıñ 27-nde onı uzun bir körüşüvde körmek kerek olğanını qayd etti. Biletlerni ayırtıp, daire kiraladı. Amma körüşüvden bir qaç künden evel müstemleke hadimi oña telefon etip, qırımtatar ŞİZOda olğanı içün körüşüv olmaycağını bildirdi.
Aynı zamanda ceza izolâtorına yerleştirilmesiniñ sebepleri telefonda aytılmay. Müessiseniñ vekili siyasiy mabüsniñ apayına, ŞİZOda bulunmasınıñ sebepleri ve müddeti aqqında tek yazılı muracaat neticesinde aytmaq mümkün, dep bildirdi.
Bundan evel Saliyevni bir qaç kere "resmiy sebeplerden", hususan, qapunı qapatmağanı, yatağı yaramay olğanı ve ilâhre sebeblerden izolâtorğa yerleştire ediler.
"Men buña basqı ve devamlı basqı olaraq baqam. ŞİZOğa yerleştirilüvi bizni körüşüvlerden marum etti, aqayımıznı — qorantasınen bağdan marum etti. Bundan soñ ise, daa sert tutuv şaraitli olğan KTOa (kamera türlü odası) avuştırılmaq telükesi bar", — dep Kreml mabüsiniñ apayı qayd etti.
Hatırlatamız ki, işğalciler Qırımda 18 jurnalist ve vatandaş jurnalistini qanunsız apiske aldılar. Olarnıñ çoqusı qırımtatardır. Ukrayina prezidentiniñ Qırım Muhtar Cumhuriyetindeki temsilciligi halqara toplulıqnı Qırımdaki matbuat vastalarınıñ taqip etilmesine diqqat ayırmağa ve işğal etilgen yarımadada söz serbestliginiñ temin etilmesine yardım etmege çağırdı.
Daa evel Seyran Saliyevniñ apayı Mümine Saliyeva, repressiyalar ve qanunsız apis etüvler neticesinde işğal etilgen Qırımda 252 bala babasız qaldı, dep tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
