İşğal etilgen Qırımda repressiyalar ve qanunsız tevqifler neticesinde 252 bala babasız qaldı. Olardan 16-sı tuvğanları apiske alınğan soñ dünyağa keldi.
Siyasiy mabüs Seyran Saliyevniñ apayı Mümine Saliyeva Facebookta bunı bildirdi.
"Olar Qırımnıñ er bir köşesinde yaşaylar: Bağçasaray rayonında eñ çoq (100-den çoq bala), Simferopol (Aqmescit — terciman), Canköy, Eski Qırım, Yalta, Aluşta, Bilogirsk (Qarasuvbazar — terciman), Feodosiya (Kefe — terciman) (Kirov) rayonlarında", — dep aytıla haberde.
Onıñ aytqanına köre, facia ve stresni başından keçirgen balalarnen çalışmaq qıyın. Farqlı yaş gruppaları, şahsiy ağrı ve yara, diñlenmek kerek olğan şahsiy ikâyeler.
"Safiyem bir qaç kün evelsi, flipçartta, qafesli babamnı ve qapatılğan közlerinen globusnıñ resimini yaptı. "Bu apiste yatqan baba. Ve bizim meselelerimizni körmegen bir dünya", — dep añlata edi o maña. Er şey yahşı añlağan qızım. "Dünya yahşı insanlarsız degil", — dep ayta bilem. "Ebet, amma qanunlar er yerde adaletsiz", — dep er şeyni añlağan qızım devam etti. "Tek olmağanımız pek yahşı, ve biz berabermiz, ve armağanlarnı qayğırğan musulmanlar ketirdi", — öpüşip ve quçaqlap, sanki ruhlandırıp, canımnı tınçlandırdı", — dep Mümine Saliyeva yazdı.
Ukraina prezidentiniñ Qırımdaki temsilciliginiñ malümatına köre, Rusiye işğalli memuriyeti 224 insannı qanunsız olaraq tuta, olarnıñ arasında — 137-si qırımtatar halqınıñ vekili.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
