Apiske alınğan qırımtatar jurnalisti Seyran Saliyevniñ apayı Mümine Saliyeva ondan soñki dört ay içinde ilk mektübini aldı. 2024 senesi boş aynıñ 20-nden berli Saliyev Tula vilâyetindeki 4-nci apishaneniñ ceza izolâtorında (ŞİZO) buluna edi.
Mümine Saliyeva mektüpni Facebook saifesinde derc etti.
"ŞİZO — bu dünyanıñ soñu degil", — dep Seyran Saliyev, apayına sağ olğanını ve er şey yahşı olğanını ayttı.
"Elbette resmen men müstemlekeniñ tertibini bozğanımnı ayttım, amma asılında men bir şey yapmadım. Bu iç tınçlığımnıñ fiyatı, dinini, qorantasını, yaqınlarını, tuvğan toprağını, Qara deñizni sevgen serbest insan ruhunıñ vaziyeti", — dep Seyran yazdı.
Qıyın şaraitke baqmadan, siyasiy mabüs vaqıtını kitap oqumağa sarf ete.
"Mında, ŞİZOda, daa bir tertip bar. O qadar kitap oqudım ki! Şimdi elimde "Taypan" — XIX asırdaki ingiltere-çin munasebetleri ve ticaretniñ dünya siyasetine nasıl tesir etkeni aqqında roman. Men Çin ve İngliz halqlarınıñ medeniyetleri, adetleri, tüşünce tarzları aqqında çoq şey ögrendim, ve bu, maña etrafımdaki kerçeklikten uzaqlaşmağa imkân bere", — dep ayta o.
Saliyevniñ mektübinde o, apayı ve balalarına muracaat ete, sağlıqları ve işleri aqqında soray.
"Özüñni yahşı etip baqmanı pek isteyim, çünki sağlığıñ — eñ müimdir. Balalar nasıl? Salih oqumağa azırlana? Bir vaqıt oña, ekim olmaq, Allah ve insanlar ögünde büyük bir mesüliyet olğanını añlatqan edim. Onıñ içün ciddiy ögrenmek kerek, bütün ğayretinen ögrenmek kerek, çünki insan — deñiştirmek mümkün olğan bir maşna degil. Onen ğururlanam ve er şeyni becerecegine inanam", — dep Saliyev qayd etti.
O, er bir bala aqqında ayrı yaza, olarnı destekley, olarnı er vaqıt yüreginde olğanını hatırlata.
"Küneşli qızım, sen nasılsıñ? Oquşnı sevgeniñni ve er şeyni becergeniñni ayttıñ — men pek memnünim. Öz-özüñni qorçala, hasta olsañ, demek, men de hastanam. Çikolatalı prensesim, resim yapmağa ketesiñmi? Yahşı ögren, çalış, ve er şey yahşı olur. Sevgilim Safiya, sen birinci sınıfta oquysıñ, meni alıp ketkenlerinde ise, daa barmağan ediñ. Seni pek sevem, qollarını quçaqlap öpem", — dep Seyran yazdı.
O, oña qoltutqan er keske teşekkür bildirip, adaletke inanğanını bildire.
"Meni ŞİZOğa mektüplernen toldurdılar — 13! Men tüşündim ki, dünya maddiy resurslar içün cenkleşkence, insanlar para ve akimiyetke ibadet etkence, dünya daa beter olacaq. Amma ağır vaqıtlarda biri: "Bunıñ episi siziñ qollarıñıznıñ işidir" dese, demek, er şey ğayıp olmadı, demek, dünyanı daa qurtarmaq mümkün ve kerek", — dep qoşa siyasiy mabüs.
"Hizb ut-Tahrir davası"nıñ ekinci Bağçasaray gruppası aqqında ne bilemiz
2017 senesi orta küz ayınıñ 11-nde Rusiye FSB işğal etilgen Bağçasarayda altı qırımtatarnı tuttı: Timur İbragimov, Marlen (Süleyman) Asanov, Memet Belâlov, Seyran Saliyev, Server Zekiryayev ve Ernes Ametov.
Bir seneden soñ, 2018 senesi mayısnıñ 21-nde, işğalciler Edem Smailov ve Server Mustafayevni evlerinde tutıp aldılar.
Olarnı Rusiyede yasaqlanğan, amma Ukraina ve dünyanıñ ülkeleriniñ çoqusında serbest faaliyet köstergen Hizb ut-Tahrir islâm siyasiy firqasınıñ faaliyetinde qabaatlaylar.
Tutulğanlarnıñ episi işğalli Kıyiv rayon mhkemesiniñ qararındn apiske alındı ve tahminen üç sene taqiqat izolâtorında tutuldı.
2022 senesi berim ayınıñ 16-nda Rostov-na-Donudaki Cenübiy bölge arbiy makemesinde bu dava üzerinde üküm çıqarıldı. Onıñ qabaatlıları 13-19 sene apis cezasına maküm etildi.
022 senesi saban ayınıñ 14-nde Vlasiha şeerindeki Apellâtsiya arbiy makemesi imayeciniñ şikâyetlerini aman-aman bütünley red etti ve mabüslerniñ apis müddetlerini aman-aman deñiştirmedi. Seyran Saliyevniñ apis cezası bir senege qısqartıldı - 15 senelik müstemleke cezasına, Ernes Ametovnıñ apis cezası lâğu etildi.
Avropa parlamenti öz rezolütsiyasında Rusiye Federatsiyasını bütün ukrain siyasiy mabüslerini, şu cümleden "Hizb ut-Tahrir davası"nıñ ekinci Bağçasaray gruppasınıñ mabüslerini azat etmege çağırdı.
"Memorial" uquq qorçalayıcı merkezi olarnı siyasiy mabüsler olaraq tanıdı ve Rusiyeni olarnı acelen azat etmege çağırdı.
Telegram, WhatsApp ve Facebookta Suspilne Qırım haberlerine abune oluñız
