Arhangelsk vilâyetindeki müstemlekede aman-aman bir yıl tutılğan soñ, siyasiy mabüs Asan Ahtemov ömür arqadaşınen ilk sefer körüşti. İşğal etilgen Qırımdan Korâjma şeerine qadar 3 biñ kilometrden çoq yolnı öz başına keçken Repika Ahtemova apis müddeti devamında sağlığı fenalaşqan aqay aqqında tarif etti.
İlk yaz ayınıñ 30-nda o, Facebook saifesinde bu aqqında yazdı.
Simferopoldan (Aqmescitten) yol bir qaç kün aldı. Çam ormanınıñ ortasında yerleşken Korâjma şeerine kelgen soñ, vesiqalarnı teşkergen soñ, körüşüvge çıqtı.
"O, odağa parlaq közlernen ve tebessümnen kirdi. Bir-birimizni quçaqladıq ve bir qaç daqqa susıp turdıq. Üç künlik yol, üç saat beklev bunıñ içün degerli edi", — dep Repika hatırladı.
Onıñ aytqanına köre, müstemlekelerde keçken bir yıl içinde Asannıñ sağlığı fenalaştı.
"Bir yıl içinde közleri pek zayıflaştı. 10-15 daqiqa oquğan soñ, kitaptaki sözler yımşadı, közleri ağrıdı, köz yaşları ve qırmızılaştı, oquvnı bir qaç saatten soñ devam ete bile. Arqası ve tizleri ağıra. 15 daqqadan ziyade oturıp olamay. Tibbiy teşkerüvni elde etmek pek qıyın, amma Asan tırışa — imkân peyda olğanda, ilânlar yaza, ekimge sağlıq meseleleri aqqında ayta. Amma bu imkân, teessüf ki, pek siyrek rastkele, dep siyasiy mabüsniñ apayı tarif etti.
Qıyınlıqlarğa baqmadan, bu üç kün ekimiz içün kerçek bir nefes aluv oldı. Olar beraber aş pişire, qave içe, gecegece qonuşa, haberler, hatıralar, hayallerinen paylaşa ediler. Repika hatırladı ki, sert teşkerüvler ve oda qomşusı olğanlar bile, evinde olğanı kibi, biri-birine yaqın olğanlarını duya edi.
"Üç kün yolculıq pek uzun oldı, tuvğan adamnen üç kün ise pek tez keçti. Men özümni tutmağa tırıştım — ağlağanımnı körmesin dep. Biz quçaqlandıq, sağlıqlaştıq, ve o ketti. Bu eñ qıyın vaqıt edi", — dedi o.
Ayrılıqnıñ acısına baqmadan, onıñ aytqanına köre, bu körüşüv er keske devam etmege küç berdi. Em Asan em o, kene de tek biri-birine degil, aynı zamanda, tikenli telniñ eki tarafında olğan bir çoq insandan destek kördiler.
"Bu körüşüv ekimizge de devam etmege küç bergenini bilem. Men oña ümüt ve yahşı kelecekke olğan işançını qaytarmağa tırıştım. Asan ise, öz nevbetinde, onıñ taqdirinen meraqlanğan, oña qoltutqan, meni ve balalarımıznı desteklegen er keske minnetdarlığını bildirdi", — dep qoştı Repika.
Ahtemov qardaşları aqqında ne bilemiz
Aziz ve Asan Ahtemovlar — qırımtatar faalcileridir.
2022 senesi berim ayınıñ 3 ve 4. künleri Aqmescitte ve Kezlevde beş qırımtatarı — iş adamı Eldar Odamanov, ağa-qardaşlar Aziz ve Asan Ahtemov, Şevket Üseinov ve Nariman Celâlovnı, Anğara köyünde gaz borusını patlatqanlarında şübeli sayılıp, tutuldı.
2022 senesi berim ayınıñ 6-nda işğalli "makeme", tutulğan qırımtatarlarnı apiske aldı.
2022 senesi berim ayınıñ 21-nde Qırımnıñ işğalli Yuqarı makemesi, Qırımtatar Milliy Meclisiniñ başınıñ muavini Nariman Celâl, vatandaş jurnalisti Asan Ahtemov ve onıñ qardaşı Aziz Ahtemovğa üküm çıqardı.
Asan Ahtemov 15 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı. Aziz Ahtemov 13 sene apis cezasını, 500 biñ ruble para cezasını aldı ve 1 sene devamında areket serbestligi sıñırlandı.
2023 senesi bozârğan ayda Qırımtatar Milliy Meclisiniñ başı Refat Çubarov, Aqmescit 2. SİZOnıñ memuriyeti Celâlov ve Ahtemov qardaşlarını maneviy ve fizikiy cezalandırğanını bildirdi.
2023 senesi orta küz ayınıñ başında Celâlov ve Ahtemov qardaşları Qırımdan Rusiye apishanesine etap etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
